Իսրայելը և Սաուդյան Արաբիան դրդում են Թրամփին «վիրաբուժական հարվածներ հասցնել» Իրանի միջուկային հաստատություններին. լրատվամիջոցներ
Իսրայելը և Սաուդյան Արաբիան ԱՄՆ նախագահ Դոնալդ Թրամփին դրդում են «վիրաբուժական հարվածներ հասցնել» Իրանի միջուկային հաստատություններին՝ ԱՄՆ նորընտիր նախագահ Ջո Բայդենի՝ հունվարի քսանին կայանալիք երդմնակալության արարողությանն ընդառաջ: Այս մասին հայտնում է eadaily.com լրատվական գործակալությունը`հղում տալով արաբական Dar al-Hayat թերթին:
Ըստ տեղեկությունների, Թրամփը նոր վարչակազմի համար հնարավորինս դժվարացնելու է Թեհրանի միջուկային ծրագրի վերաբերյալ Գործողությունների համատեղ համապարփակ ծրագրին (JCPOA) վերադառնալը:
Նշվում է նաև, որ Թել Ավիվը և Էր Ռիադը պնդում են Իրանի միջուկային ենթակառուցվածքին նպատակային հարվածներ հասցնելու կարևորությունը՝ հաշվի առնելով այն փաստը, որ անցյալ տարի Իրանի իշխանությունները խախտել են համաձայնագրի պայմանները և ուրանի հարստացումը հասցրել մինչև 20 տոկոս:
Ըստ թերթի, Արաբական Միացյալ Էմիրությունները մաս չեն կազմում Իսրայելի և Սաուդյան Արաբիայի կողմից Իրանին հարվածներ հասցնելու լոբբինգ իրականացնելու այս ջանքերին, հակառակ Աբու Դաբիի`Թեհրանի հետ շարունակական անհանգիստ հարաբերություններին:
Ինչպես հաղորդում է լրատվական գործակալությունը, Իրանի նախագահ Հասան Ռոհանին դեկտեմբերի 17-ին ասել է, որ «կասկած չունի», որ ԱՄՆ-ի նոր վարչակազմը կվերադառնա 2015 թվականի միջուկային համաձայնագրին և կվերացնի Իրանի տնտեսության դեմ պատժամիջոցները: Ռոհանին նաև պարզաբանել է, որ Իրանը պատրաստ է վերադառնալ միջուկային համաձայնագրի կատարմանը, եթե Վաշինգտոնը հրաժարվի պատժամիջոցներից և վերադառնա միջուկային ծրագրին:
Անցյալ ամիս Ջո Բայդենը քննադատել էր ԱՄՆ-ի ներկայիս վարչակազմի իրանական կուրսը, ներառյալ Թրամփի՝ Իրանի հետ միջուկային գործարքը միակողմանիորեն խախտելու որոշումը: Նորընտիր նախագահը ևս մեկ անգամ հաստատել է միջուկային համաձայնագրին վերադառնալու իր ցանկությունը: Միևնույն ժամանակ շեշտել է, որ մտադիր չէ թույլ տալ Իրանին ձեռք բերել միջուկային զենք:
Հիշեցնենք, որ ԱՄՆ-ի նախագահ Դոնալդ Թրամփի լիազորություններն ավարտվում են հունվարի 20-ին և նախագահի պաշտոնն ստանձնելու է դեմոկրատ Ջո Բայդենը: