Թուրքերը Գորիս-Կապան ճանապարհին ցուցանակ են տեղադրում՝ «բարի գալուստ Ադրբեջան»․ Գորիսի փոխքաղաքապետ Իրինա Յոլյան

Գորիսի փոխքաղաքապետ Իրինա Յոլյանը ֆեյսբուքյան իր էջում լուսանկարներ է հրապարակել, որոնցում երևում է, որ ադրբեջանցիները «Բարի գալուստ Ադրբեջան» գրությամբ ցուցանակ են տեղադրել։

Գրառումը ներկայացնում ենք ստորև․

«Թուրքերը լցված են Գորիս-Կապան միջպետական ճանապարհը. ցուցանակ են տեղադրում։ Տեսնու՞մ եք գրառումը` բարի գալուստ ադրբեջան։ Դե ասեք սա Սյունիքը չէ, ասեք, որ սահմանները ամուր են, ասեք, որ ճիտը սա էր, որ զանգեզուրում թուքը պիտի գրի` բարի գալուստ դժոխք ։ Հպարտացեք անթասիբներ»։

Նշենք, որ մինչ այդ էլ Իրինա Յոլյանը լրագրողներին ահազանգել էր, որ ադրբեջանցիները Գորիսի այգեգործական ընկերություններից մեկի տարածքում գտնվող 12 շենք-շինությունն ազատելու համար 1 ժամ ժամանակ են տվել։ 

Նա ասել է, որ այդ շենք-շինությունում կան նաեւ տներ, որտեղ քաղաքացիներ են ապրում. «Բացի այդ 12 շենք-շինությունից, անցնում է նաեւ ամենաբերրի հողամասերը, որոնք կարեւոր նշանակություն ունեն գյուղատնտեսության համար։ Կառավարությանն առընթեր Անշարժ գույքի կադաստրի պետական կոմիտեի վկայականն ունեն։ Այդ մարդիկ ասում են, որ բոլոր փաստաթղթերն առկա են, որ մեր պետական սահմանում են, բայց, ըստ էության, ադրբեջանցիներին տրված է հնարավորություն՝ բանակցելու եւ ասելու՝ ոչ, մերն է, ազատեք տարածքը»։

Փոխքաղաքապետը պատմել է, որ քաղաքացիները խնդրել են գոնե 3 ժամ ժամանակ տան, սակայն ադրբեջանցիները չեն համաձայնվել։

Նա ասաց, որ այս պահին այնտեղ բանակցում է Գորիս փոխքաղաքապետը։

«Մենք պնդում ենք, որ սրանք մեր հողերն են, որոնք երբևէ Ադրբեջանինը չեն եղել, բաց, միեւնույն է, իրավիճակի թելադրողը մնում է Ադրբեջանը»,- նշել է Իրինա Յոլյանը։