Նա մեզ խաբեց, թե հետ կբերեմ փողերը, բայց տվեց հողերը. Արա Սահակյան
Գլխավոր զգացումը, որ ունեմ այս օրերի ընթացքում, ամոթի զգացումն է. ես ամաչում եմ, որ իմ երկիրը ներկայացնում է այդ մարդը: Այս մասին, այսօր՝ դեկտեմբերի 23-ին, Հանրապետության հրապարակում ընթացող ընդդիմության հանրահավաքում հայտարարեց «Հայրենիք» կուսակցության անդամ, ԱԺ նախկին փոխնախագահ Արա Սահակյանը:
«Ես ամաչում եմ, որ նա դեռ նստած է այնտեղ: Ամոթը մնալու է իր հեռանալուց հետո, որ մենք հանդուրժել ենք սա»,-ասաց նա՝ հավելելով, որ Նիկոլ Փաշինյանը տանուլ տվեց մեր երկիրը, կոֆլիկտ, բախում ստեղծեց սերունդների միջեւ:
«Ինչ ես թողել քեզանից հետո, էլ ի՞նչ ունես տալու, էլ ինչ ունես կործանելու: Նա մեզ տարավ պարտության, կործանման: Նա մեզ խաբեց, թե հետ կբերեմ փողերը, բայց տվեց հողերը: Կորցրած հողերը շատ դժվար է լինելու վերականգնել եւ այդ ծանր հոգսը մենք թողեցինք մեզնից հետո եկողների վրա: Սա է, որ հնարավոր չի ներել»,-ասաց Արա Սահակյանը:
Նա ընդգծեց, որ բոլորս մեղավոր ենք, որ Նիկոլ Փաշինյանը ծնվեց, մեծացավ. «Որովհետեւ իր հետ աշխատող խմբագիրները, լրագրողներն ասում էին՝ դե լավ, Նիկոլն ա, իր լաչառությունն է անում, որովհետեւ բիզնեսմեններն ասում էին՝ դե լավ, շան պես հաչում է, մի կոպեկ տանք, թող ձայնը կտրի: Ավելի ավագներն ասում էին՝ համարձակ տղա է, եկեք առաջ տանք, թող առաջ գնա: Ահա, բոլորս բերեցինք նրան իշխանության, ամեն մեկս մեր չափով, եւ մենք պետք է նրան հետ շպրտենք»:
Նիկոլ Փաշինյանը կործանեց ու փոշիացրեց մեր պատմության 33 տարիների արդյունքները, վստահ է «Հայրենիք» կուսակցության խորհրդի անդամը։
«Նա վերջին հարբեցողի նման տանուլ տվեց մեր երկիրը։ Նա ոչնչացրեց մի սերնդի կյանքի արդյունքները, նա բախում ստեղծեց սերունդների միջեւ։ Նա տրորեց մեր սերունդների համերաշխությունը։ Հայրերին ու որիդներին իրար դեմ հանեց։ Էլ ի՞նչ ունես տալու, ու կործանելու»,- ասաց Սահակյանը։
Նա իր սերնդակից պատգամավորներին եւ Ղարաբաղ կոմիտեի անդամներին դիմեց, թե ո՞ւր են՝ չկան։
«Դուք ինչո՞ւ եք նստել իմ երեկվա ընկերներ, դուք ուզո՞ւմ էիք Ղարաբաղն այս օրին լիներ։ Դուք ուզո՞ւմ էիք, որ կորցնեինք այն տարածքները, որոնք բանակցությունների սեղանին կարող էին լինել որպես կռվան։ Ո՞ւր են Ղարաբաղ կոմիտեի դեռ ողջ մնացած անդամները, անձնական երջանկությունն են վայելո՞ւմ։ Մի՞թե դուք պատասխանատվություն չեք զգում ժողովրդի առաջ, սա ձեր ստեղծած, ձեր սկսած շարժման արդյունքն էր, որ այն ստահակը ոչնչացրեց»,- հայտարարեց Սահակյանը։