Ընտանեկան բժիշկը 40 տարի բեղմնավորել է պացիենտներին և դարձել հարյուրավոր երեխաների հայր
ԱՄՆ Միչիգան նահանգի Դեթրոյթ քաղաքի բժիշկը տասնյակ տարիներ բեղմնավորել է պացիենտներին և արդյունքում դարձել հարյուրավոր երեխաների հայր: Այս մասին գրում է The Sun թերթը:
104-ամյա Ֆիլիպ Փևենը (Philip Peven) 40 տարի աշխատել է որպես ընտանեկան բժիշկ և ընդունել է 9 հազար կանանց ծննդաբերությունները: Պարզվում է, նա պարբերաբար հանդես է եկել որպես սերմի դոնոր հղիանալու ցանկություն ունեցող հաճախորդների համար: Անցյալ տարի նրա կենսաբանական դուստրերից մեկը՝ Ջեյմի Հոլլը (Jaime Hall), որոշել է գտնել իր կենսաբանական հորը և հանձնել է ԴՆԹ թեստ: Արդյունքում նա իմացել է, որ իր կենսաբանական հայրը եղել է Փևենը:
Շնորհիվ կենսատեխնոլոգիական 23andMe ընկերության կայքի նա գտել է իր արյունակից եղբայրներին և քույրերին: «Մենք բոլորս ծնվել ենք նույն հիվանդանոցում, իսկ մեր ծննդյան վկայականներում Փևենը նշված է որպես մանկաբարձ և գինեկոլոգ, ոչ թե հայր»,- ընդգծել է 61-ամյա Հոլլը Միչիգան նահանգի Թրավերս-Սիթի քաղաքից:
Նա սկսել է կապվել իր բոլոր պոտենցիալ հարազատների հետ, որոնց գտել է կայքում: 2020 թվականի հունվարին Հոլլը համագործակցել է իր խորթ քրոջ հետ և որոշել հանդիպե Փևենի հետ: Թոշակի անցած բժիշկը բացատրել է, որ նա իսկապես օգտագործել է իր սերմը հաճախորդներին հղիացնելու համար: Երբեմն որպես դոնոր հանդես են եկել իր գործընկերները՝ պարզաբանել է նա:
Փևենն իրեն անվանել է առաջամարտիկ արհեստական բեղմնավորման ոլորտում: Նրա խոսքով՝ ինքը եղել է սերմի դոնոր 1947 թվականից՝ Չիկագոյում անցկացված հետազոտությունից հետո:
Այդ տարիներին նախկին բժիշկը չէր կարող ենթադրել, որ երբևէ մարդկանց միջև ազգակցական կապը կարելի կլինի հեշտությամբ պարզել ԴՆԹ թեստավորման օգնությամբ: «Նա ասաց. «Ես երբեք չէի մտածում, որ այդպիսի բան հնարավոր կլինի: Դա իսկական հեքիաթ է, այդպես չէ՞»»,- վերապատմում է Հոլլը:
Հոլլը և նրա արյունակից եղբայրներն ու քույրերը դրական վերաբերմունք ունեն այդ բացահայտման հանդեպ: «Ես դրանում ոչ մի վատ բան չեմ տեսնում: Բոլոր այդ կանայք, այդ թվում նաև մեր մայրերը, նրա մոտ են գնացել հուսահատությամբ, և նա տվել է նրանց այն, ինչի կարիքը նրանք ունեցել են,- բացատրել է նա:- Ես իսկապես կարծում եմ, որ նա փորձել է օգնել մարդկանց, և առանց նրա ես այժմ չէի լինի»: