Ես տեսնում եմ, որ խախտվել է ոչ միայն ԼՂՀ հարցի, այլև Հայաստանի անվտանգության կոնցեպտը. Հովհաննես Իգիթյան
«Այդ մտավախությունը պետք է բոլորս ունենանք, որ հանկարծ Հայաստանում չլինեն ֆիզիկական բախումներ: Այս մասին այսօր՝ դեկտեմբերի 7–ին խորհրդարանում լրագրողների հետ զրույցում ասաց «Իմ քայլը» խմբակցության անդամ, Արտաքին հարաբերությունների հանձնաժողովի փոխնախագահ Հովհաննես Իգիթյանն՝ անդրադառնալով առաջին նախագահ Լեւոն Տեր-Պետրոսյանի հայտարարությանը, թե «Հայրենիքի փրկության շարժման» վարչապետի միասնական թեկնածու Վազգեն Մանուկյանի և վարչապետ Նիկոլ Փաշինյանի պահվածքից դատում է, որ քաղաքացիական բախման վտանգ կա։
«Ես լսում եմ տարբեր մարդկանց ելույթներ և չեմ տեսնում իրավիճակից ելնելու գաղափարներ, այլ տեսնում եմ մարդկանց դեպի ագրեսիվությունը տանող հորդորներ: Կարող է մի քիչ ռոմանտիկ հնչի, բայց ինձ թվում է, որ երբ իրավիճակը վատ է, և պետությունը վտանգված է, մարդիկ պետք է ոչ թե այլ մարդկանց շուրջ միավորվեն, այլ իրավիճակից դուրս գալու լուծումներ գտնեն»,– նշեց նա՝ օրինակ բերելով իրեն, որ ինքը կապի մեջ է սփյուռքի հետ։
Հարցին՝ երբ ընդդիմությունը պահանջում է վարչապետի հրաժարականը, իսկ վարչապետը չի էլ ակնարկում դրա մասին, դա կարո՞ղ բախումների պատճառ լինել՝ Հովհաննես Իգիթյանն արձագանքեց.
«Այսինքն, երբ վարչապետին ասում են՝ հեռացիր, վարչապետն էլ չի հեռանում, դա բախո՞ւմ է: Բոլորս պետք է օրենքի շրջանակներում աշխատենք, ի՞նչ է նշանակում բախում: Բախում՝ նշանակում է Քրեական օրենսգրքի խախտում, որեւէ մեկը դրա իրավունքը չունի: Ո՛չ ընդդիմության ոտքը պետք է տրորվի, ո՛չ իշխանավորի ոտքը պետք է անօրինական ձեւով տրորվի: Հիմա իմ աշխատանքը ես ինչպե՞ս եմ տեսնում․ ես տեսնում եմ, որ խախտվել է ոչ միայն ԼՂՀ հարցի, այլև Հայաստանի անվտանգության կոնցեպտը։ Ես այն քաղաքական թիմում եմ եղել, որը 90–ական թվականներին լինելով պատգամավոր, փորձել ենք ստեղծել Հայաստանի անվտանգության համակարգը, հասկանալով ԽՍՀՄ փլուզումից հետո Թուրքիայի դերակատարությունը և վտանգը...»։
Լրագրողը մեջբերեց Վազգեն Մանուկյանի խոսքերը, որ եթե չհեռանա այս կառավարությունը ու շարժումը չհաղթի, գազազած ամբոխը հոշոտելու է իրեն:
«Գնացեք իրեն հարցրեք՝ ի՞նչ է դա նշանակում, նշանակո՞ւմ է արդյոք, որ ինքը մարդկանց համարում է գազազած մի ամբոխ ու պետք է ասի՝ գնացեք այս մարդուն հոշոտեք կամ սպանեք: Դա սխալ է: Ինձ թվում է՝ իրավապահ մարմինները պետք է զբաղվեն դրանով, այսինքն, Հայաստանում օրենքները պետք է աշխատեն»,–արձագանքեց Հովհաննես Իգիթյանը։
Նա հայտարարեց, թե առաջին իսկ օրվանից անհանգստացած է եղել, որ Հայաստանում արյուն չթափվի։ Հովհաննես Իգիթյանն անդրադառնալով արտահերթ ընտրություններ անցկացնելու պահանջներին, ասաց, որ նման հարցերը չեն քննարկվում ինչ–որ տեղում հավաքված մարդկանց կողմից, իսկ առանձին մեկ այլ շենքում էլ նստած Կառավարությունը այլ բան է ասում։ Նրա համոզմամբ՝ ցանկացած հարց լուծվում է բանակցություններով։
«Եթե մարդիկ իրոք մտահոգված են, ի՞նչն է խանգարում, նստեն և քննարկեն: Եթե դու բան ունես ասելու, օրինակ, Նիկոլ Փաշինյանին՝ որպես վարչապետ, խոսելու տեղը սեղանն է»,– նկատեց նա։
Դիտարկմանը, որ ասում են՝ կապիտուլյացիա ստորագրած իշխանությունը պետք է հեռանա, և նորը գա, Հովհաննես Իգիթյանը պատասխանեց. «Ով որ գտնում է, որ դա կապիտուլյացիա է, ինքը նաեւ համաձայն է այն անօրինականություններին, որոնք տեղի են ունենում միջազգային իրավունքի տեսակետից, որոնք այսօր տեղի են ունենում օրինակ, մեր սահմանում: Կապիտուլյացիա նշանակում է, որ դու քո թշնամուն տալիս ես քո սուվերենիտետը, քո սահմանները, արդյոք մենք համաձա՞յն ենք տալ, իհարկե, ոչ: Ո՞ր համաձայնագրով է դա արվել, ահա սրա մասին է պետք խոսել:Ես խնդրեցի մարդկանց, որ չփորձեն արդարացնել այդ հայտարարությունը, որովհետեւ այդ հայտարարությունը՝ որպես տեքստ, արդարանալու բան չի: Ես ի գիտություն ընդունեցի այն պատճառաբանությունը, որ մարդիկ, որոնք ներկա են եղել կոնկրետ այս հայտարարության քննարկման ժամանակ ՌԴ-ի հետ, կամ միջնորդված, ընդունեցի այն, բայց ես համաձայն չեմ, որ այդ հայտարարությունը ԼՂ խնդրի լուծում է: Ես հիմա աշխատում եմ, որ այդ հայտարարությունը չդառնա Մինսկի խմբի բանակցային կոնցեպտի մաս: Դա որեւէ կապ չունի բանակցությունների հետ»: