Փորձագետներ. ԼՂՀ-ում ռուսական ռազմաբազա չի լինի, սակայն խաղաղապահների թիվը կարող է ավելանալ

Օպերատիվ ռազմավարական տեսանկյունից եւ ՀԱՊԿ շրջանակներում անվտանգության ապահովման տեսանկյունից Ղարաբաղում ռազմաբազան Ռուսաստանին բացարձակապես պետք չէ: Այս մասին դեկտեմբերի 4-ին Մոսկվա-Երեւան առցանց տեսակամուրջի ընթացքում ասաց ռազմական գիտությունների դոկտոր, Ռուսաստանի հրթիռային եւ հրետանային գիտությունների ՌԴ ակադեմիայի տեղեկատվության քաղաքականության հարցերով փոխնախագահ, թղթակից անդամ Կոնստանտին Սիվկովը:

«Բացի այդ, Ռուսաստանը բոլոր բազաները տեղակայում է ճանաչված պետությունների տարածքներում, քանի որ դա համապատասխան միջազգային պայմանավորվածության առկայություն է ենթադրում: Ուստի այս պայմաններում Լեռնային արաբաղի տարածքում բազայի ստեցծումն անհանր է, իսկ ահա ղարաբաղյան կողմի առաջարկով խաղաղապահ ուժերի կազմի ավելացում միանգամայն հնարավոր է»,- շեշտեց նա:

Փորձագետը նշեց, որ ռազմաբազան բավականին բարդ օբյեկտ է, որը մի շարք դիրքեր է ներառում, ինչպիսիք են օդանավակայանը, համապատասխան սարքավորումների առկայությունը` համապատասխան հզորությունների ռազմական տեխնիկայի վերանորոգման ապահովման համար, զինամթերքի պահեստներ, բնակարանային ֆոնդ եւ այլն, ուստի տնտեսական տեսանկյունից Ղարաբաղում բազայի տեղակայումը բարդ խնդիր կլինի: «Բացի այդ, Լեռնային Ղարաբաղում ռուսական բազայի հայտնվելը ռուս-ադրբեջանական հարաբերությունների կտրուկ սրման կհանգեցնի, ինչը Ռուսաստանի համար բացարձակապես պետք չէ»,- հավելել է Սիվկովը:

«Առսենալ օտեչեստվա» ամսագրի գլխավոր խմբագիր Վիկտոր Մուրախովսկին իր հերթին նշել է. «Մենք այս տարածաշրջանում` Հայաստանի տարածքում, ռազմաբազա ունենք, կան զորքեր Հարավային Օսիայում եւ Աբխազիայում: Թե ինչի համար է մեզ մշտական ​​ներկայություն պետք Լեռնային Ղարաբաղի տարածքում, որի կարգավիճակը դեռ որոշված ​​չէ, ինձ համար բացարձակապես անհասկանալի է: Առավել եւս, որ ռազմաբազայի տեղակայման դեպքում մենք ցամաքով ուղիղ հաղորդակցություն չենք ունենա այս տարածքից: Ռուսաստանը շահագրգռված չէ նման օբյեկտ ստեղծելու հարցում»: