Միացյալ Նահանգները պետք է օգնություն ցուցաբերի հումանիտար ճգնաժամից տուժած Լեռնային Ղարաբաղին. սենատորներ Բոբ Մենենդես, Ռոբ Պորթմեն
Միացյալ Նահանգները պետք է օգնություն ցուցաբերի հումանիտար ճգնաժամից տուժած Լեռնային Ղարաբաղին: Նման համոզմունք են հայտնել ԱՄՆ Կոնգրեսի արտաքին հարաբերությունների հանձնաժողովի անդամներ, սենատորներ Ռոբերտ Մենենդեսն ու Ռոբ Պորթմենը տարածած համատեղ հայտարարությունում:
«Հումանիտար իրավիճակը Հարավային Կովկասում աղետալի է, և ձմռան մոտենալով պայմանավորված` վիճակն էլ ավելի է ծանրանալու: Դրան են նպաստելու ինչպես կորոնավիրուսը, այնպես էլ` Թուրքիայի աջակցությամբ Ադրբեջանի հրահրած պատերազմի` Լեռնային Ղարաբաղի ենթակառուցվածքներին հասցված հսկայական վնասները: Լեռնային Ղարաբաղի էթնիկ հայկական բնակչության կեսից ավելին հեռացել է, մասնավորապես` կանանց ու երեխաների 90%-ը: Ռազմական գործողությունները թեև ավարտվել են, բայց դրանց հասցրած վնասները միջազգային հանրության կողմից որոշիչ գործողությունների բացակայության պայմաններում շարունակում են մարդկանց կյանքեր խլել»,- շեշտել են սենատորները:
Մենենդեսն ու Պորտմանը Լեռնային Ղարաբաղի վերականգնման համար անհրաժեշտ ֆինանսավորումից զատ խնդրել են նաև Սենատին կոնկրետ միջոցներ հատկացնել Լեռնային Ղարաբաղի տարածքում ականազերծման աշխատանքների համար:
Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։
Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: ՌԴ խաղաղապահների տեղակայումն Արցախում արդեն ավարտին է հասցվել:
Ռազմական գերատեսչության տվյալներով՝ Լեռնային Ղարաբաղում իրենց մշտական բնակության վայրեր է տեղափոխվել ավելի քան 27 հազար քաղաքացի: