Ճապոնիայում առանց ստեղների հատուկ վերելակներ են ստեղծել՝ կորոնավիրուսով վարակման նոր դեպքերի աճի ֆոնին
Ճապոնական Hitachi Ltd. և Mitsubishi Electric ընկերությունները վերելակների մոդելներ են ներկայացրել, որոնք շահագործելու համար ստեղների օգտագործման կարիք չի լինի, ինչը կնպաստի կորոնավիրուսով վարակման վտանգի նվազեցմանը:
Ինչպես հաղորդում է РИА Новости-ն՝ հղում անելով ճապոնոկան հեռուստաալիքին, Hitachi ապրանքանիշի ներկայացրած տարբերակի դեպքում ուղևորը վերելակից կարող է օգտվել հաղորդագրությունների ակնթարթային փոխանակման LINE հավելվածի օգնությամբ կամ վերելակի խցիկում տեղադրված հատուկ QR-ծածկագրի սկանավորման միջոցով: Ուղևորը հարկն ընտրում է անձնական սմարթֆոնի միջոցով և որևէ ստեղնի դիպչելու կարիք չի ունենում:
Mitsubishi Electric ընկերությունը, իր հերթին վերելակ է ներկայացրել, որը կարող է ավտոմատ կերպով կանչվել և ուղևորին տանել նրան անհրաժեշտ հարկ, եթե վերջինիս մասին տվյալները նախապես ներառված լինեն ծրագրում: Դա նույնպես արվում է սմարթֆոնի համար նախատեսված հատուկ հավելվածի օգնությամբ:
Անցյալ շաբաթվանից սկսած Ճապոնիայում պարբերաբար թարմացվում է կորոնավիրուսով վարակման ցուցանիշի հակառեկորդը: Կիրակի երկրում արձանագրվել է վարակման 2058 նոր դեպք, որից 10-ը՝ մահվան ելքով: Համաճարակի սկզբից ի վեր երկրում վարակվել է 148 272 մարդ, մահացել՝ 2133-ը: