Իշխանությունը առանց լուրջ հիմքերի պահպանվող ռազմական դրությունը պետք է չեղարկի, այլևս չի կարող զսպել մարդկանց արդարացի ցասումը․ Գոհար Մելոյան
Առանց լուրջ հիմքերի իշխող ուժը շարունակում է պահպանել ռազմական դրությունը՝ անկախ այն ուժը կորցրած ճանաչելու արդարացի պահանջներին, բայց բարեբախտաբար ի օգուտ հանրության, դատարանները շարունակում են արդար դատաքննության գործառույթի իրականացումը։ Այս մասին Tert.am-ի հետ զրույցում ասաց սահմանադրագետ Գոհար Մելոյանը՝ անդրադառնալով վարչական դատարանի կողմից Արթուր Ղազինյանի, Արծվիկ Մինասյանի և Վահե Գրիգորյանի կողմից ներկայացված հայցով միջանկյալ միջոց կիրառելուն, որով կասեցվել է կառավարության 2020 թվականի սեպտեմբերի 27-ի «Հայաստանի Հանրապետությունում ռազմական դրություն հայտարարելու մասին» թիվ 1586-Ն որոշման հավելվածի III գլխի 8-րդ, IV գլխի 9.1-ին կետերի և 9.1-ին կետին առնչվող մասով 10-րդ կետի գործողությունը, այսինքն վերացվել է հավաքների ազատության արգելքը։
«Մարտ ամսվանից արտակարգ դրություն էր հայտարարվել և պարբերաբար երկարաձգվում էր` միտում ունենալով մարդու հիմնարար ազատություններից հավաքների ազատությունը սահմանափակել, որպեսզի իշխանությունը հիմք ստեղծի մարդկանց արադարացի ցասումը խեղդելու համար։ Նույնն էլ ռազմական դրության ժամանակ ենք ականատես լինում»,-ասաց նա։
Գոհար Մելոյանը հիշեցրեց, որ այս պատերազմին նախորդող մարտական գործողությունների ժամանակ ռազմական դրություն չէր հայտարարվել։
«Եթե համեմատություն էլ անցկացնենք`ապրիլյան պատերազմի ընթացքում ռազմական դրություն չէր հայտարվել,։ Հուլիսյան մարտերի ժամանակ էլ, երբ գործողությունները արդեն ՀՀ-ում էին ընթանում, կրկին ռազմական դրություն չէր հայտարարվել։ Իսկ այս պարագայում առաջին օրվանից հայտարարվեց ռազմական դրություն, իր մեջ սահմանափակումներ մտցնելով մարդու իրավունքների հիմնարար ազատությունների սահմանափակաման շրջանակներում՝ հավաքների ազատության, խոսքի, տեղեկատվության տարածման ազատության»,-ասաց նա։
Գոհար Մելոյանը շեշտեց, որ վարչական դատարանի որոշումից հետո մարդիկ արհեստական զսպվածություն հավաքների ազատության հետ կապված չեն ունենա։
«Իշխող ուժը քրեականացրեց ռազմական դրության ժամանակ հավաքներ իրականացնելը, եթե նախկինում մարդկանց բերման էին ենթարկում ոստիկանի պահանջին չենթարկվելու համար, հիմա մեղադրանքներ են առաջադրում ռազմական դրության ժամանակ հավաքներ իրականացնելու համար։Այսուհետ այդ հնարավորությունից զրկվելու են, եթե անգամ մեղադրանք փորձեն առաջադրել, դատարանի համապատասխան որոշումը կա, որի հիման վրա, մեղադրանքների հետ կապված կիրականցվեն բողոքարկումներ, բնականաբար բողոքը կբավարավի»,-նշեց սահմանադրագետը։
Գոհար Մելոյանի խոսքով՝ իշխանությունները ցանկանան թե ոչ ռազմական դրությունը պիտի չեղարկեն։