Խորհրդանշական ճնշում Ֆրանսիայի կառավարության վրա. Le Figaro-ի անդրադարձը՝ Սենատում ԼՂ անկախության ճանաչման բանաձևի ընդունմանը
Ֆրանսիական Le Figaro պարբերականն անդրադարձել է Ֆրանսիայի սենատի կողմից «Լեռնային Ղարաբաղի ճանաչման մասին» բանաձի ընդունմանը:
Հոդվածում նշվում է, որ չորեքշաբթի օրը Սենատի խոսնակ Ժերար Լարշեի նախաձեռնությամբ խորհրդարանական խմբակցությունների հինգ ղեկավարներ ներկայացրեցին «հայկական քաղաքակրթության բնօրրան» Լեռնային Ղարաբաղը ճանաչելու մասին բանաձևի նախագիծը:
Բանաձևը դատապարտում է Թուրքիայի իշխանությունների աջակցությամբ Ադրբեջանի իրագործած ռազմական ագրեսիան և կոչ է անում Ֆրանսիային մարդասիրական օգնություն տրամադրել հայերին, ինչպես նաև միջազգային հետաքննություն պահանջել ռազմական հանցագործությունների վերաբերյալ: Վերջապես, բանաձևը շեշտում է տեղահանված անձանց վերադարձի և հայկական մշակութային և կրոնական ժառանգության պահպանման անհրաժեշտությունը:
«Այս բանաձևը ուժեղ քաղաքական քայլ է, որը ցույց է տալիս մեր համերաշխությունը Հայաստանին, - չորեքշաբթի երեկոյան Հայաստանի և Ադրբեջանի դեսպանների հետ հանդիպումից հետո ասել է Արտաքին գործերի և պաշտպանության հարցերով հանձնաժողովի ղեկավար Քրիստիան Կամբոնը,- Լեռնային Ղարաբաղում մենք գործ ունենք ողբերգության հետ: Արդյո՞ք ֆրանսիական դիվանագիտությունն իրեն չի դատապարտում անզորության՝ մնալով չեզոք դատավորի դիրքում», - հարց է հղել սենատորը:
«Դարավոր բարեկամություն»
Նոյեմբերի 9-ին Ռուսաստանի հովանու ներքո Հայաստանի ու Ադրբեջանի միջև կրակի դադարեցման համատեղ հայտարարություն ստորագրելու լուրից հետո ֆրանսիացի սենատորներն անհանգստացած են հայերի ապագայի համար, գրում է հոդվածագիր Մարիո Մուրգը:
«Այսօր հայ բնակչությունը, որի հետ մեր երկիրը կապված է դարավոր բարեկամական կապերով, կրկին տառապում է Լեռնային Ղարաբաղում»,- հիշեցնում են բանաձևը ստորագրած հինգ խմբակցությունների ղեկավարները` Բրունո Ռետայոն ՝ հանրապետականներից, Էրվե Մարսեյը ՝ ցենտրիստներից, Պատրիկ Կանները ՝ սոցիալիստներից, Էլիան Ասասին` կոմունիստներից և Գիյոմ Գոնտարը` «կանաչներից»: «Առաջ, հանրապետությունը» չի միացել բանաձևի այս նախագծին և նախընտրել է մեկ այլ բանաձև, որն ավելի քիչ է շեշտը դնում Լեռնային Ղարաբաղի դիվանագիտական ճանաչման վրա:
«Ֆրանսիան այլևս չի կարող անտեսել այն փաստը, որ միայն Լեռնային Ղարաբաղի Հանրապետության լիարժեք և լիակատար անկախությունը կդառնա առաջին հենքը», - համոզված են խորհրդարանականները:
«Ֆրանսիան չի կարող անտեսել զինված ռեժիմի կողմից կազմակերպված Թուրքիայի խարդավանքները», - հավելում են նրանք ՝ Թուրքիայի նախագահ Ռեջեփ Թայիփ Էրդողանին մեղադրելով «Թուրքիայի շրջապատը խորապես ապակայունացնելու» քաղաքականության համար:
Չնայած բանաձևի նախագիծը պարտադիր չէ, այն ձգտում է Լեռնային Ղարաբաղի ճանաչումը դարձնել «բանակցային գործիք կայուն խաղաղության ձևավորման համար», ինչպես նշում է Բրունո Ռետայոն: «Հանրապետականները» մտադիր են դրան նպաստել նաև Ազգային ժողովում ՝ բոլոր խորհրդարանականներին գործընթացում ներգրավելու համար: Սա դառնում է խորհրդանշական ճնշում կառավարության վրա, որպեսզի Մինսկի խմբի անդամ Ֆրանսիան ընդունի այս առաջարկը: