Փաշինյանի հրաժարականի հասարակական մեծ պահանջ կա, չի կարելի ժողովրդին հիմարի տեղ դնել․ ակցիայի մասնակից
Իշխանություններից մեր հիմնական պահանջը Նիկոլ Փաշինյանի հրաժարականն է, և «Իմ քայլի» պատգամավորներից պահանջում ենք, որ դեմ քվեարկեն ապօրինաբար ռազմական դրությունը շարունակելուն, որովհետև ռազմական դրությունը երկար պահելը նրա համար է, որ տեղի ունեցած դավաճանության դեմ բողոքի ձայնը խեղդեն, ուրիշ պատճառ չկա։ Ազգային ժողովի բակում Նիկոլ Փաշինյանի հրաժարականի և ռազմական դրության չեղարկման պահանջով իրականացվող ակցիայի ժամանակ նշեց ակցիայի մասնակից Արսեն Մարտոյանը:
Անդրադառնալով իշխանության այն պնդումներին, որ ակցիաները մարդաշատ չեն, և դա խոսում է իշխանության նկատմամբ վստահության մասին՝ քաղաքացին նշեց.
«Իշխանություններն իրենց տներում նստած ֆեյսբուքի կոմենտներով փորձում են հասկանալ՝ ինչ է կատարվում հասարակության մեջ, բայց այդ կոմենտների 90 տոկոսը իրենց ֆեյքերն են։ Նիկոլ Փաշինյանի հրաժարականի հասարակական մեծ պահանջ կա, որովհետև չի կարելի ամբողջ ժողովրդին հիմարի տեղ դնել: Երեկ ԱԺ փոխնախագահ Լենա Նազարյանը Պետրոս Ղազարյանի հետ հարցազրույցի ժամանակ դիտարկմանը, թե տարածքները հանձնեցիք, ասում է՝ տարածքները չենք հանձնել, մարտի դաշտում ենք կորցրել: Կարո՞ղ եք ասել, քանի տարածք մարտի դաշտում ընկավ և ո՞նց հանձնվեցին: Կա հասարակական մեծ ճնշում, և ռազմական դրությունն այդ պատճառով էլ երկարաձգվում է, որ մարդիկ չկարողանան դուրս գալ և իրենց բողոքը չհայտնեն դավաճանական արարքի դեմ»:
Դիտարկմանը, թե ակցիա անողների հասցեին հաճախ մեղադրանք է հնչում, թե ակցիաներ անելու փոխարեն գնայիք ռազմաճակատ, բայց Դուք առաջիններից եք մեկնել ռազմաճակատ և վիրավոր վերադարձել, Արսեն Մարտոյանը պատասխանեց. «Ճակատ գնալը գլուխ գովելու բան չէ, դա պարտականություն է հայրենիքի նկատմամբ, գնացել եմ ոչ միայն ես, այլև իմ նման հազարավոր մարդիկ, և ոչ միայն ես, այլև իրենք այս խայտառակությանը դեմ են, ու ովքեր էլ, որ դուրս չեն եկել բողոքելու, հետո են դուրս գալու»
Ակցիայի մասնակիցը նշեց, որ ակցիաները լինելու են շարունակական, մինչև հասնեն Նիկոլ Փաշինյանի հրաժարականին: