Ձեր տրամաբանությամբ շարժվելու դեպքում մենք 94 թվականից ի վեր ու առհավետ պետք է մնայինք ռազմական դրության պայմաններում. Գևորգ Գորգիսյանը՝ Հովհաննես Իգիթյանին
Պարոն Իգիթյան, Ձեր տրամաբանությամբ մենք 94 թվականից ի վեր ու առհավետ պետք է լինենք ռազմական դրության պայմաններում, որովհետև շրջափակված ենք հարևաններով, որոնք ագրեսիվ են տրամադրված մեր նկատմամբ: Այս մասին ԱԺ արտահերթ նիստին հայտարարեց «Լուսավոր Հայաստան» խմբակցության քարտուղար Գևորգ Գորգիսյանը՝ ի պատասխան «Իմ քայլը» խմբակցության պատգամավոր Հովհաննես Իգիթյանի հարցի:
Իգիթյանը ռազմական դրությունը չեղարկելու նախագծի հիմնական զեկուցող Գևորգ Գորգիսյանից, մասնավորապես, հետաքրքրվել էր՝ արդյոք հիմա Թուրքիայի, Ադրբեջանի և իսլամիստների վտանգը վերացե՞լ է, որ ռազմական դրությունը չեղարկենք:
Գորգիսյանն ընդգծեց, որ մեր հարևանները միշտ հայտարարել են, որ ընդհուպ մինչև Երևանն են գրավելու: «Այսինքն՝ եթե մենք Ձեր տրամաբանությամբ շարժվենք, մենք միշտ պետք է լինեինք ռազմական դրության պայմաններում և երբեք չհանեինք այդ իրավական ռեժիմը: Բայց ամսի 9-ին ստորագրված կապիտուլյացիոն հայտարարությունից հետո եղել են հայտարարություններ ՌԴ նախագահի, ՌԴ ԱԳ նախարարի, ՀՀ վարչապետի կողմից, որ տարածաշրջանում այլևս անվտանգ է, ռազմական գործողությունների վտանգ չկա, և դրա համար տրվել են երաշխիքներ»,- ասաց Գորգիսյանը:
Նա հավելեց, որ մենք ունենք ՌԴ խաղաղապահներ Արցախում, որոնք, կարծես թե, ըստ պայմանագրի, երաշխավորում են այդ անվտանգությունը: «Եթե պնդում եք, որ վարչապետը սուտ է ասել, կամ կարող եք փաստել, որ ՌԴ նախագահը կամ ԱԳ նախարարին չեք վստահում, ի՞նչ կարող եմ ասել, էլ ում կարող եք վստահել, եթե ոչ մեր ռազմավարական դաշնակցին և ձեր վարչապետին»,- արձագանքեց Գորգիսյանը: