Ոսկու գինը փոքր-ինչ նվազում է կորոնավիրուսի հետ կապված անորոշության ֆոնին. Նավթի համաշխարհային գներն աճում են

Երկուշաբթի առավոտյան ոսկին փոքր-ինչ էժանացել է, ներդրողները համաշխարհային տնտեսության վերականգնման հեռանկարները գնահատում են կորոնավիրուսի դեմ պատվաստանյութերի վերաբերյալ նորությունների ֆոնին, այս մասին վկայում են սակարկությունների տվյալները, փոխանցում է «Փրայմը»։

Նյու Յորքի Comex բորսայում ոսկու դեկտեմբերյան ֆյուչերսի գինը նվազել է 0,03 տոկոսով կամ 0,55 դոլարով՝ հասնելով տրոյական ունցիայի դիմաց մինչեւ 1871,85 դոլարի։ Արծաթի դեկտեմբերյան ֆյուչերսներն էժանացել են 0,19 տոկոսով՝ հասնելով ունցիայի դիմաց մինչեւ 24,32 դոլարի։

Ոսկու գինը երկուշաբթի աննշան նվազում է կորոնովիրուսի դեմ պատվաստանյութի վերաբերյալ նորությունների ֆոնին առաջացած լավատեսության հետեւանքով։ Այսպես՝ անցած շաբաթ Moderna բիոտեխնոլոգիական ընկերությունը հայտնել էր իր թեկնածուի 94,5 տոկոսով արդյունավետության մասին։ Նոյեմբերին ավելի վաղ Pfizer ընկերությունը հայտնել էր BioNTech-ի հետ համատեղ մշակման 90 տոկոս դեպքերի արդյունավետության մասին։ Ավելի ուշ հաղորդվել էր, որ պատվաստանյութի արդյունավետությունը կազմում է 95 տոկոս։

Ընդ որում՝ կորոնավիրուսով հիվանդացության շարունակվող աճը զսպում է թանկարժեք մետաղների գնանկումը։ Մի շարք երկրներ գրանցում են ռեկորդային աճ, իրավիճակը շարունակում է առանձնապես ծանր մնալ ԱՄՆ-ում։ Ջոն Հոփքինսի համալսարանի տվյալներով՝ ԱՄՆ-ում առնվազն մեկ շաբաթում կորոնավիրուսով վարակման հաստատված դեպքերի թիվն աճել է 1 միլիոնով եւ անցել 12 միլիոնից, իսկ օրական աճը շարունակում է մնալ 100 հազար դեպք նիշից բարձր։

Դրանից բացի, ոսկուն աննշան աջակցություն է ցույց տալիս դոլարի փոխարժեքի նվազումը։ Դոլարի թանկացման դեպքում մետաղն ավելի է թանկանում օտարերկրյա արժույթ ունեցողների համար։

Նավթ

Երկուշաբթի՝ նոյեմբերի 23-ին, նավթի համաշխարհային գներն աճում են։ Այս մասին վկայում են սակարկությունների տվյալները։

WTI նավթի հունվարյան ֆյուչերսներն աճել են 0,24 տոկոսով՝ կազմելով մեկ բարելի դիմաց 42,52 դոլար։

Brent տեսակի նավթի ֆյուչերսները՝ հունվարյան մատակարարումներով աճել են 0,47 տոկոսով՝ հասնելով մեր բարելի դիմաց մինչեւ 45,17 դոլարի։

Պղինձ

Երկուշաբթի առավոտյան պղնձի գինն ընկնում է` ուրբաթ օրվա աճուրդներին գրեթե 3 տոկոսանոց աճից հետո, վկայում են աճուրդների տվյալները:
Comex բորսայում պղնձի դեկտեմբերյան ֆյուչերսների արժեքը նվազել է 0.18 տոկոսով` մեկ ֆունտի (մոտ 0.45 կիլոգրամ) դիմաց հասնելով 3.28 դոլարի, հաղորդում է Prime-ը:

Ուրբաթ օրը Լոնդոնի մետաղների բորսայում (LME) աճուրդների ընթացքում պղնձի մեկ տոննայի արժեքը երեք ամիս անց մատակարարմամբ աճել է 2.6 տոկոսով` կազմելով 7277.5 դոլար, ալյումինի արժեքը` 0.03 տոկոսով` կազմելով 1993 դոլար, ցինկի արժեքը` 1.25 տոկոսով` մեկ տոննայի դիմաց կազմելով մինչեւ 2793.5 դոլար: Իսկ Comex-ում աճուրդների արդյունքում պղնձի ինքնարժեքն աճել է 2.78 տոկոսով:

Երկուշաբթի ներդրողները նախընտրում են ֆիքսել շահույթն ուրբաթ օրվա ակտիվ գնումներից հետո: Դա պայմանավորված էր կորոնավիրուսի դեմ պատվաստանյութերի մշակման շուրջ ընդհանուր լավատեսությամբ, ինչպես նաեւ Չիլիում` այս մետաղի աշխարհի առաջատար արտադրող երկրում հանքավայրերից մատակարարումների խափանման ռիսկերով: