«Իմ երեխեն չկա՝ ուրա, բա էսքան ժամանակ ինչ եք անում, անուն տվեք՝ ես որտեղից պահանջեմ իմ երեխուն». անհետ կորած զինվորների ծնողները բողոքի ակցիա են իրականացնում
Անհետ կորած զինվորների ծնողները ՊՆ-ի դիմաց բողոքի ակցիա են իրականացնում` պահանջելով լուծում տալ իրենց խնդիրներին և աշխատանք տանել երեխաներին գտնելու համար:
«Մենք քաղաքական թեմաներ չունենք, այդ մեկնաբանությունները, որ գրում եք, մի հատ մտածեք, հետույքով մի մտածեք, ուղեղով մտածեք, եթե ունեք: Մի վիրավորեք որդեկորույս ծնողիներին, մենք չենք եկել ասենք՝ մեզ աթոռ տվեք»,- նշում էին ծնողները` դիմելով սոցիալական ցանցերում իրենց վիրավորողներին:
Նրանց հետ հանդիպման դուրս եկավ «Իմ քայլը» խմբակցության պատգամավոր Անդրանիկ Քոչարյանը և հայտնեց, որ այսօր կառավարությունում քննարկվելու են նմանատիպ բոլոր հարցերի լուծման քայլերը:
«Առաջարկում եմ վաղը 15-20 հոգի ընտրել ձեզանից և ԱԻՆ, ՊՆ-ի հետ գալ քննարկման, մենք կներկայացնենք այն ճանապարհը, որով մենք այս հարցի լուծումը առաջարկելու ենք»,-նշեց Անդրանիկ Քոչարյանը, իսկ ծնողները հարց բարձրացրին, թե այսքան օր անցել է ինչու են նոր մտածում լուծումները:
«Պարոն Քոչարյան, ձեզնից ոչ մեկը բարեկամ չի ունեցել»,-ասաց ծնողներից մեկը և Անդրանիկ Քոչարյանը պատասխանեց.«Ես տղա ունեմ ու եղբոր տղա ունեմ»:
Ծնողներից մեկն ասաց, որ արդեն 50 օր տղան չկա, ինչի են նոր քննարկում: Քաղաքացիները առաջարկցին հատուկ նիստ գումարել և այս հարցը քննարկել, քանի որ առավել կարևոր հարց չկա: «Բոլոր ծնողներով գնանք Ազգային ժողով և բոլորիս ներկայությամբ այդ քննարկումը արվի: Մեր առաջին պահանջը մեր երեխաներին գտնելն է, երկրորդ պահանջը այն է, որ մեր տղաները ում ձեռքերով հայտնվել են այս իրավիճակում, բոլոր այդ սրիկա սպաներին կանեչել պատասխանատվության»,-ասաց ծնողներից մեկը:
«Իմ երեխեն չկա ուրա, բա էսքան ժամանակ ինչ եք անում, անուն տվեք, ես որտեղից պահանջեմ իմ երեխուն»,-նշեց մեկ այլ անհետ կորած զինվորի ծնող:
«Մենք 40 օրա ոչ քնել գիտենք, ոչ հելնել գիտենք, ոչ խոսել գիտենք, չենք հասկանում օրը ոնցա անցնում, խնդրում ենք ուղղակի մեր երեխեքին տան մեզ, էլ բան չենք ուզում»,-ասաց մեկ այլ ծնող: