Նիկոլ Փաշինյանի հրաժարականը պետք է դառնա համահայկական պահանջ, նա օր առաջ պետք է հեռանա. Գեղամ Մանուկյանն անժամկետ հացադուլ սկսեց (Տեսանյութ)

Այսօր ես անժամկետ հացադուլ եմ հայտարարում ոչ թե որևէ օտար հարստահարիչի դեմ, այլ մեր երկրի վարչապետի հրաժարականի պահանջով: Այս մասին լրագրողների հետ զրույցում ասաց ՀՅԴ անդամ Գեղամ Մանուկյանը:

Նա նշեց, թե անցնող մոտ մեկ տասնօրյակի ընթացքում քաղաքական պայքարի բազում փորձեր են եղել, որոնց մասնակցել է նաև ինքը, սակայն, ՀՅԴ ներկայացուցչի խոսքով, վերջին 10 օրերը ցույց տվեցին, որ Փաշինյանը շարունակում է կառչած մնալ իր աթոռից, պատրաստ է զոհաբերել բոլորին, միայն թե շարունակի մնալ Կառավարության շենքում:

Ըստ Մանուկյանի՝ այն պահանջները, որոնք ներկայացվում էին հասարակության, քաղաքական ուժերի կողմից, գիտական շրջանակներից, հստակ էին՝ Փաշինյանը պետք է հեռանա:

«Վարչապետը, որը գաղտագողի, միայնակ, առանց խորհրդակցելու որևէ մեկի հետ՝ ստորագրել է կապիտուլյացիոն հայտարարություն, որն իր ապաշնորհ գործունեությամբ 2,5 տարվա ընթացքում փլուզել է մեր արտաքին դիվանագիտական հարաբերությունները մեր ռազմավարական դաշնակցի հետ, այլ երկրների հետ, որը պոռոտախոսությամբ, ինքնագովեստով, մտածելով լոկ սեփական անձի, նեղ շրջանակի մասին՝ կազմալուծել է Հայաստանի կառավարման ողջ համակարգը, որը նվաստացուցիչ պայմաններով ստորագրել է փաստաթուղթ, երբ հնարավորություն ուներ շատ ավելի լավ պայմաններով զինադադար կնքել պատերազմի տարբեր փուլերում, և, ի վերջո, մեր հայրենիքի մեծագույն մասը մեկ ստորագրությամբ թշնամուն հանձնած վարչապետը օր առաջ պետք է գնա»,-ասաց Մանուկյանը:

Վերջինիս խոսքով՝ այս վարչապետով ՀՀ-ն չի կարող ունենալ զարգացում, չի կարող որևէ դիվանագիտական գործունեություն ծավալել՝ հատկապես Արցախյան հարցում, հավանական բանակցային պրոսեցում:

«Փաշինյանի հրաժարականին բոլորը համաձայն են, այդ թվում՝ իշխանական խմբակցության պատգամավորներ, որոնք էկրանից այն կողմ ասում են՝ նա պետք է հեռանա. սա պետք է դառնա համահայկական, համահայաստանյան պահանջ, նա օր առաջ պետք է հեռանա»,-նշեց Մանուկյանը՝ հավելելով, թե հացադուլն իր վերջին փորձն է, և անցկացնելու է Կառավարության շենքի մոտ:

Անդրադառնալով հարցին՝ ընդդիմադիր քաղաքական ուժերի և քաղաքացիների հանրահավաքները շարունակվելու՞ են, Մանուկյանն արձագանքեց, թե իր կարծիքով՝ այո, քանի որ հացադուլն անհատ Գեղամ Մանուկյանի որոշումն է: