Հասարակությունը պետք է գիտակցի, որ հիմնական աղետը Քաշաթաղի հանձնելուց հետո է սկսվելու, և ստեղծված իրավիճակում Նիկոլ Փաշինյանն ու իր թիմը չեն կարող շարունակել ղեկավարել. Հակոբ Ավետիքյան

Ստեղծված իրավիճակում, պատերազմի նման ելքից, կապիտուլյացիոն խայտառակ փաստաթղթի ստորագրումից հետո մեր հիմնական խնդիրն է ժողովրդի բարոյահոգեբանական վիճակը բարելավելը, վերկանգնելը կամ մեղմացնելը այս անկումային տրամադրությունները: Այս մասին Tert.am-ի հետ զրույցում ասաց ՀՌԱԿ ատենապետ Հակոբ Ավետիքյանը:

Նա նշեց, որ ստեղծված պայմաններում կարիք կա հասարակությանը բերել իրականության դաշտ: «Արդեն բավական բան բացատրվում է ընդդիմության կողմից հրավիրված հավաքներում: Շեշտադրումները, բացատրությունները, որ շատ բաների մասին են խոսում այս օրերին: Խոսվում է իշխանությունների հետևողական սխալների մասին: Այս ամենին զատ, պետք է ցույց տրվի, բացատրվի, որ հիմանական մեր խնդիրները առաջանալու են Քարվաճառի հանձնումից հետո»,- ընդգծեց նա:

Ավետիքյանը նշեց, որ դրանից հետո 140 կմ երկարությամբ մեր պաշտպանելի գոտին երկարելու է, իսկ Վարդենիսն ամբողջովին թշնամու ողորմածության տակ է ընկնելու: «Ինչպե՞ս պետք է անել այդ ամբողջը կազմակերպելու, դիմադրողականությունը վերականգնելու. սա է մեր հիմնական խնդիրը, դրա համար աշխատողներ են պետք այսօր: Պետք է բացատրել, որ պատերազմական ամբողջ շրջանում, ինչպես նաև դրանից առաջ էլ մեր պետական կառույցները, գերատեսչությունները, նույնիսկ 40 տոկոսով չէին աշխատում: Հետևաբար այս իրավիճակում հանդուրժել Նիկոլ Փաշինյանին և իր կառավարությանը, նաև իր խորհրդարանական մեծամասնությանը կբերի նոր-նոր աղետների, որովհետև հսկայական աշխատանք կա, որ պետք է տարվի և՛ բանակում, և՛ պաշտպանության համակարգում, և՛ քաղաքացիական, պետական կառույցների աշխատանքներում: Ո՞վ է անելու դա»,- ասաց նա:

Ավետիքյանը շեշտեց, որ այսօր «Իմ քայլը» խմբակցությունը դարձել է մեր երկրի կույրաղիքը, չնայած նրան՝ մենք խորհրդարանական երկիր ենք:

Ըստ Ավետիքյանի՝ երկրորդ կարևոր խնդիրն այն է, որ պետք է հատկապես ուշադրություն դարձնել Զանգեզուրի պաշտպանությանը ու Մեղրու՝ այսպես կոչված, «միջանցքի» տրամադրման խնդրի վրա: «Դա անկարելի է թույլ տալ: Քանի որ արդեն ստորագրված է մի փաստաթուղթ, որը մեզ տանում է դեպի նորանոր անկումներ, ես կարծում եմ, որ այստեղ ժողովրդի, հասարակական դիմադրողականությունը պետք է բարձրացնել, և եթե անհրաժեշտ լինի, պետք է այնպես անենք, որ հազարավոր մեր հայրենակիցներ գնան իրենց մարմնով ծածկեն այդ ամբողջ գոտին, որ Մեղրին չհանձնվի, միջանցք չտրամադրվի»,- նշեց նա:

Ավետիքյանի խոսքով՝ ստեղծված իրավիճակը կարող է բերել պետականության կորստի: «Ես կարծում եմ՝ մենք պետականության կորուստ արդեն իսկ ունենք: Հիմա էլ, փաստորեն, ժողովրդի մոտ կա այն տպավորությունը, որ ռուսները եկել են, իրենք կանեն ինչ-որ պետք է: Այս տրամադրությունները սխալ են: Այո՛, ՌԴ-ն մեր դաշնակիցն է, մեր միակ դաշնակիցն է, սակայն ժողովուրդը պետք է գիտակցի, որ ինքը միայն կարող է իր հարցերը լուծել, իր ներքին ռեսուրսներով»,- շեշտեց նա:

Ինչ վերաբերում է Թուրքիայի ակտիվացմանը, Ավետիքյանը նշեց՝ դա բնական է և նշեց, որ ինքը միշտ է ընդգծել, որ մեր հիմնական թշնամին է, և մնում է Թուրքիան, և որ Թուրքիայի նվաճողական քաղաքականությունը հիմա էլ տարածվում է մեզ վրա: «Հետևաբար այս պայմաններում Նիկոլ Փաշինյանի իշխանությունը պետք է անմիջապես հեռանա, որ մենք կարողանանք ինչ-որ փոփոխություններ մտցնել ստեղծված իրավիճակում: Նույնիսկ, երբ երեկ Լավրովը հայտարարեց, որ փոփոխություններ չեն կարող լինել ստորագրված փաստաթղթում, բայց քանի որ այնտեղ անորոշ կետեր շատ կան և որ այդ թղթի կտորում է արձանագրվել, որ հետագա բանակցությունների նյութեր կան, պետք է կարողանանք մեր բոլոր ռեսուրսներն օգտագործել: Ստեղծված իրավիճակում այս իշխանությունը չի կարող ունենալ և չունի այլևս գոյության որևէ պատճառ, տրամաբանություն, մանավանդ որ իշխանությանը՝ Նիկոլ Փաշինյանի գլխավորությամբ, տրվել էր զուտ եղած թուղթը մինչև կատարելու պարտականություն, ուրիշ ոչ մի պարտականություն չունի, ինչը մեզ համար անընդունելի է»,- հայտարարեց նա:

Դիտարկմանն էլ հասարակության մի զանգված դեռ շարունակում է սատարել Փաշինյանին, Ավետիքյանը նշեց, որ եթե այսքանից, այս ամենից հետո այդ մարդիկ չեն տեսնում, չեն գիտակցում, այդ պարագայում մենք էլ այդ մարդկանց ինչպե՞ս բացատրենք:

«Ես, դիտարկելով իմ շրջապատը, հարևանություն, մարդիկ, քաղաքացիներ, լրագրողներ սփյուռք. պատկերը փոխվել է, բազմաթիվ մարդիկ, որոնք մինչ պատերազմը և հատկապես այդ փաստաթղթի ստորագրումը, եթե աջակցում էին նրան, հիմա իրենց խաբված են զգում, ասում են՝ սխալվել ենք, իսկ նրանք, որ չեն հասկանում, եթե այդ մարդն անգամ գյուղական համայնք չի ղեկավարել, ինչպե՞ս կարող է երկիր ղեկավարել, նրանց բացատրելը բարդ է, դժվար էլ ընկալեն, եթե նրանք դեռ շարունակում են պաշտպանել, էլ ոչինչ էլ անել հնարավոր չէ»,- ընդգծեց նա: