Ուշագրավ դեպք. կնոջ որովայնում փայծաղը տեղաշարժվել է 30 սանտիմետրով
36-ամյա կնոջ մոտ բժիշկները հայտնաբերել են չափազանց տարօրինակ պաթոլոգիա. նրա որովայնի շրջանում փայծաղը կարող է տեղաշարժվել 30 սանտիմետր: Այդ ուշագրավ կլինիկական դեպքը նկարագրված է New England Journal of Medicine-ում:
Medportal.ru-ի հաղորդմամբ՝ հիվանդը դիմել էր հիվանդանոց որովայնի հատվածում ցավերի ու փսխումների գանգատներով, որոնք շարունակվել են մեկ օր: Նա նաեւ ուներ ստամոքսի խոց եւ լյարդի ցիրոզ, սակայն այդ պաթոլոգիաները չէին նրա ծանր վիճակի ուղղակի պատճառը:
Համակարգչային տոմոգրաֆիան ցույց էր տվել, որ հիվանդի փայծաղը գտնվում էր աջ կողմում (ոչ թե ձախում, ինչպես նորման է), իսկ ենթաստամոքսային գեղձը տեղաշարժվել էր: Արյան անալիզը վկայում էր ենթաստամոքսային գեղձի վնասվածքի մասին:
Նախքան հիվանդանոց դիմելը հիվանդն անցել էր համակարգչային տոմոգրաֆիա լյարդի քաղցկեղ հետազոտելու համար: Այդ նկարներում էր հայտնաբերվել ձախ կողմում փայծաղը, իսկ ենթաստամոքսային գեղձի դիրքը նորմալ էր:
Այդ հազվագյուտ վիճակը կոչվում է «թափառող փայծաղ», եւ ի հայտ գալիս հյուսվածքների ձգման արդյունքում, որոնք պահում են այդ օրգանը: Գիտնականները ենթադրում են, որ հյուսվածքների վնասման պատճառն այդ դեպքում դարձել է լյարդի պաթոլոգիան՝ առաջնային սկլերոզային խոլանգիտ: Այն ուղեկցվում է լեղուղիների բորբոքմամբ եւ լյարդի ցերոզի առաջացմամբ: Արյունը դժվարությամբ է անցնում լյարդով, ուստի այն մեծ քանակությամբ է մատակարարվում փայծաղում, ինչը հանգեցնում է այդ օրգանի մեծացմանը: Հավանաբար, փայծաղի մեծացումը պատճառ է հանդիսացել դրա շուրջ հյուսվածքների լայնացման համար:
Թափառող փայծաղի ուրիշ պատճառները կարող են լինել բնածին. որոշ երեխաներ, օրինակ, կարող են ծնվել առանց որոշ հյուսվածքների, որոնք պահում են այդ օրգանը: Չափահասության ժամանակ հյուսվածքները կարող են ձգվել տրավմաների, հղիությունից հետո, միացնող հյուսվածքների հիվանդությունների հետեւանքով:
Ինչպես նշել է բժիշկ Ալեքսանդր Ուեսթերը, ամենամեծ վտանգը, որը ներկայացնում է այդ վիճակը, փայծաղի ինֆարկտի զարգացումն է (օրգանի մասնակի մահացում) արյան մատակարարման խախտումների պատճառով: Առանց բուժման այդ վիճակը կարող է հանգեցնել նաեւ մահվան: Բացի այդ, թափառումը կարող է առաջացնել օրգանի բորբոքում:
Թափառող փայծաղի բուժման հիմնական մեթոդը դրա հեռացումն է: Սակայն վերոնշյալ հիվանդի դեպքում բժիշկները որոշել էին չդիմել վիրահատության, քանի որ կինը սպասում էր լյարդի փոխպատվաստման, իսկ փայծաղի հեռացումը կարող էր խոչընդոտել այդ վիրահատությանը: Հաղորդվում է, որ կնոջ վիճակը լավացել էր սիմպտոմատիկ բուժումից հետո: