2020թ․ կապիտուլյացիայի հիմքերը Փաշինյանը դեռ ամենասկզբից էր դնում՝ վարկաբեկելով հերոսներին, գեներալներին և կազմաքանդելով ԵԿՄ-ն․ Աղասի Ենոքյան

Քաղաքագետ Աղասի Ենոքյանը ֆեյսբուքյան գրառում է արել, որում նշում է, որ վարչապետ Նիկոլ Փաշինյանն Արցախի կապիտուլյացիայի հիմքերը դրել էր իշխանության գալու առաջին իսկ օրերից։ Գրառման մեջ ասվում է․

«Գեներալ Մանվելի դեմ «տուշոնկա շոուն» Նիկոլի ռեժիմի առաջին աննախադեպ սուտն էր, որը հսկայական ազդեցություն ունեցավ հասարակության վրա։

Բացի մեթոդական խնդրից՝ անսահման ու լկտի ստի մեթոդի փորձարկումից, այն եւս երկու հիմնական խնդիր էր լուծում, որոնք համահունչ էին Նիկոլի քաղաքական նպատակի՝ Արցախը հանձնելու հետ։ Առաջինը հերոսների վարկաբեկումն էր։ Մանվելին հետեւեց Յուրի Խաչատուրովին վարկաբեկելը, հետո՝ Ռոբերտ Քոչարյանին, գեներալներ Օգանովսկուն, Վիտալի Բալասանյանին, Սեյրան Օհանյանին, եւ այլոց։ Այս հերոսներին փորձելով բարոյապես ոչնչացնել, հետո Նիկոլը իրեն իրավունք վերապահեց նրանց մեկուսացնել ռազմական գործողություններից, դավաճան կոչել, նրանց վրա մեղքեր բարդել։

Երկրորդ կարեւոր թիրախը «Երկրապահ» միության կազմաքանդումն էր։ «Երկրապահը» ձեւավորվել էր որպես բանակին ամենամերձ աշխարհազորային ռեզերվ, որն իր մարտունակությունը ցույց տվեց նաեւ 2016թ․պատերազմի ժամանակ։ Մանվելին հանելով, ներքին խժդժություններ առաջացնելով, «Երկրապահը» Սասուն Միքայելյանին հանձնելով, Նիկոլը այս կարեւոր ռեզերվը հանեց խաղից դուրս։ Պատահական չէ, որ պատերազմի ժամանակ, բացի Սասուն Միքայելյանի անհասկանալի պայմաններում վիրավորվելուց, մենք «Երկրապահի» մասին համարյա չլսեցինք։

Այսինքն, 2020թ․ կապիտուլյացիայի հիմքերը Նիկոլը դեռ ամենասկզբից էր դնում եւ քայլ առ քայլ գնում էր այդ նպատակին»։