Ֆեյքերի դեմ բողոքի ակցիա «Հանրային կապերի և տեղեկատվության կենտրոն» ՊՈԱԿ-ի դիմաց. Ցուցարարները ծաղկեպսակ էին բերել իրենց հետ
Մի խումբ քաղաքացիներ այսօր՝ նոյեմբերի 19-ին, սոցիալական կայքերի կեղծ օգտատերերի դեմ բողոքի ակցիա են անում «Հանրային կապերի և տեղեկատվության կենտրոն» ՊՈԱԿ-ի դիմաց։ Նրանք ծաղկեպսակ է էին բերել իրենց հետ:
Ակցիայի մասնակիցներից Մանուել Մանուկյանը նշեց. «Պետությանը վնաս է հասցվել, այն աղջիկը, որ կարող էր արժանապատիվ աշխատանք գտնել, իրեն հայհոյելու համար վարձատրել են: Ես իրենց ծնողներին կոչ եմ անում կանգնեցնել իրենց, որովհետեւ արդեն իսկ բացահայտվում են եւ խայտառակվելու են: Թույլ մի տվեք, որ հայհոյեն վիրավոր տղերքին, զոհվածների ծնողներին: Սա հիմնական բուծարանն է, ես գտնելու եմ նաեւ մնացած ՊՈԱԿ-ները: Մեր հերոս տղերքի մայրերը ինչ ուզեն, կխոսեն, կուզեն, Նիկոլին կքննադատեն, իրենք վշտի մեջ են, իրավունք ունեն, իսկ ձեր նման պիղծերը մտնում ու հայհոյանք են գրում: Ձեզ գտնելու եք»:
Նա հավելեց, որ 21 հազարից ավելի ֆեյքեր են եղել ֆեյսբուքում, որոնք գործել են. «Այս ամենի պատասխանատուները եղել են Նիկոլ Փաշինյանի գլխավորությամբ Ստյոպա Սաֆարյանը, Արարատ Միրզոյանը, Ալեն Սիմոնյանը, Տարոն Չախոյանը, Հովիկ Մովսիսյանը: Ամեն գրած հայհոյանքի համար դուք եք պատասխան տալու: Մնացած տվյալները մեկ առ մեկ տեղադրվելու է»:
Ակցիայի մյուս մասնակիցը՝ «Անտիֆեյք հեղափոխության» նախաձեռնության ղեկավար Արսեն Նիկողոսյանն էլ ասաց, որ իրենց բերած ծաղկեպսակը նշանակում է, որ ֆեյքերի հուղարկավորումն արդեն արվել է. «Ես ձեզ կոչ եմ անում, եթե դուք մինչեւ ժամը 11-ը չհանգստացաք եւ շարունակեցիք վիրավորել ժողովրդին, մենք կհրապարակենք ձեր լուսանկարները: Մենք հստակ գիտենք՝ ովքեր են հայհոյում իշխանության ընդդիմախոսներին: Պարոն Փաշինյան, պարոն դավաճան, դուք սրանից հետո ոստիկանական պատերի հետեւից եք տեսնելու Հայաստանի Հանրապետությունը»:
Դրանից հետո նրանք ծաղկեպսակը, որի վրա գրված էր «Դավաճան Նիկոլին եւ իր ֆեյքերին՝ ժողովրդից» մոտեցրին, որ դնեն շենքի մոտ, սակայն ոստիկանները թույլ չտվեցին այն դնել մուտքի մոտ եւ փակել մուտքը: Ծաղկեպսակը դրվեց մի փոքր հեռու՝ ճաղերի մոտ:
Հիշեցնենք, ավելի վաղ հայտնի էր դարձել, որ 733 մլն դրամ է հատկացվել հայտնի ՊՈԱԿ–ին Արցախի խնդրից հանրությանը շեղելու և հանրությանը պառակտելու համար:
Արցախում պատերազմական գործողությունների դադարեցումից և հողերը հանձնելու համաձայնագրի ստորագրումից հետո հանրությունն իր դժգոհությունը հայտնեց պատերազմի ողջ ընթացքում իրենց կեղծ և լավատեսական լուրերով սնելու, այդ կերպ բանակին թիկունքից հարվածելու իշխանությունների վարքագծի վերաբերյալ։ Արդյունքում հանրային պարսավանքի թիրախում հայտնվեց պատերազմական գործողությունների մասին հանրությանն իրազեկող թիվ մեկ պատասխանատուն՝ ՊՆ ներկայացուցիչ (նախկին) Արծրուն Հովհաննիսյանը, մինչդեռ ինֆորմացիոն տիրույթում նույն գործելաոճը որդեգրել էր նաև
Կառավարության «Հանրային կապերի և տեղեկատվության կենտրոն» ՊՈԱԿ–ը։ Եթե պատերազմի առաջին օրերին ՊՈԱԿ–ը համակարգում և կամավորների միջոցով սոցիալական ցանցերում փորձում էր հակազդել ադրբեջանաթուրքական քարոզչությանը, ապա հոկտեմբերի սկզբից այն լծվեց ՀՀ վարչապետ Նիկոլ Փաշինյանի PR–ին։ Մասնավորապես սոցիալական ցանցերում մեդիագրոհներ կազմակերպողներին հանձնարարվեց տարածել Նիկոլ Փաշինյանի հարցազրույցներն ու ելույթները, իսկ ՊՈԱԿ–ի կողմից ուղղորդվող տարբեր օգտատերերի միջոցով սկսեցին տեղեկություններ տարածել, թե «Մերոնք հետ են բերել Ջաբրայիլի բոլոր դիրքերը», «Բունկերում ողջ են գտել 100 հայ զինվորի» և նմանօրինակ կեղծ լուրեր՝ այդ կերպ թաքցնելով ռազմաճակատում տիրող իրական պատկերը և մոլորության մեջ գցելով ամեն օր զինվորից լուր սպասող ծնողներին։ Պատերազմի ընթացքում ՊՈԱԿ–ի և նրա տնօրենի կատարած աշխատանքի վերլուծությանը հետագայում ավելի մանրամասն կանդրադառնանք, իսկ այժմ փաստերով ներկայացնենք, թե վերջին մեկ տարվա ընթացքում որքան գումար է հատկացվել այս կառույցին և ինչի համար։
ՀՀ կառավարությունը 2020թ. համար պետական բյուջեից 733 մլն 555 հազար ՀՀ դրամ է հատկացրել «Հանրային կապերի և տեղեկատվության կենտրոն» ՊՈԱԿ–ին։
Պայմանագիրը կնքվել է վարչապետի աշխատակազմի գործերի կառավարիչ Վ. Պապիկյանի և «Հանրային կապերի և տեղեկատվության կենտրոն» ՊՈԱԿ–ի տնօրեն Հովհաննես Մովսիսյանի միջև (խմբ. Ներկայումս Հանրային հեռուստաընկերության տնօրեն)։ Պայմանագրով՝ ՊՈԱԿ–ը պետք է իրականացներ հանրային իրազեկում և հասարակական–քաղաքական հետազոտություններ։ Սակայն պարզվում է Հովհաննես Մովսիսյանի ղեկավարած կառույցը հատկացված միջոցների գերակշիռ մասը նախատեսել էր ուղղել ոչ թե երկրին սպառնացող արտաքին և անվտանգային խնդիրների մասին հանրությանն իրազեկելուն, այլ ներքաղաքական թեմաներով վերլուծությունների և կառավարությանը ոչ հաճո հրապարակումները հերքելուն։
Մինչ Թուրքիան և Ադրբեջանը բացահայտ հայտարարում էին Արցախի դեմ պատերազմ սկսելու մասին, Նախիջևանում համատեղ զորավարժություններ իրականացնում և մեդիատիրույթում հակահայկական հրապարակումներով հող նախապատրաստում հարձակման համար, Հայաստանի կառավարության ՊՈԱԿ–ը միլիոնավոր դրամների գումարներ էր մսխում ներքաղաքական թեմաների վերաբերյալ տարատեսակ ամփոփոգրեր պատրաստելու, հայկական ԶԼՄ–ների մշտադիտարկման, լրատվական դաշտում տեղ գտած ապատեղեկատվություն պարունակող հրապարակումները հերքելու և նմանօրինակ հարցեր լուծելու համար։
Այսպես՝ կառավարության և «Հանրային կապերի և տեղեկատվության կենտրոն» ՊՈԱԿ–ի հետ կնքված պայմանագրով՝ 2020թ. հունվար–հոկտեմբերին նախատեսված է եղել մինչև 300 հրապարակում, վերլուծություն և տեղեկանք՝ Լեռնային Ղարաբաղի հիմնախնդրի, հայ–ադրբեջանական հակամարտության, Ադրբեջանի հակահայ քարոզչության վերաբերյալ։
Նույն ժամանակահատվածում լրատվական դաշտում տեղ գտած տեղեկատվությունները հերքելու, սոցիալական ցանցերի մշտադիտարկման, ներքաղաքական թեմաներով ամփոփագրերի, վերլուծական հոդվածների հրապարակման համար նախատեսված նյութերի թիվը եղել է 4000–ը։ Նշենք, որ ներկայացված ցուցանիշների մեջ ներառված չեն կառավարության աշխատանքների լուսաբանմանը կամ սոցիալ–տնտեսական թեմաներով վերլուծություններին վերաբերող տվյալները. խոսքը զուտ ներքաղաքական թեմաներին, ԶԼՄ–ների հերքելուն ուղղված միջոցների մասին է։
Համաձայն մամուլի հրապարակումների` Հովհաննես Մովսիսյանը ձևավորել և տևական ժամանակ համակարգել է հանրությանը պառակտած «ֆեյքերի» ֆաբրիկան։ Իսկ պատերազմական իրադրության պայմաններում, երբ հանրության ուշադրությունը ռազմաճակատն էր, Հովհաննես Մովսիսյանը նշանակվեց Հանրային հեռուստաընկերության գործադիր տնօրեն։ Նրա նշանակումով հանրայինում դրվեց տարբեր դասալիքների միջոցով բանակին վարկաբեկելու և ամեն կերպ Նիկոլ Փաշինյանի ստորագրած հողերը հանձնելու համաձայնագիրն արդարացնելու «առաքելության» մեկնարկը։ Հովհաննես Մովսիսյանը և նրա համախոհները այսօր էլ բանակի թիկունքում շարունակում են իրենց «առաքելությունը»՝ ֆեյքային գրոհների թիրախ դարձնելով ընդդիմադիրներին և ոչ յուրային լրատվամիջոցներին։