Կարո՞ղ է արդյոք կորոնավիրուսը ճաղատացման հանգեցնել

Կորոնավիրուսով վարակված եւ ապաքինված շատ մարդիկ բախվում են այդ հիվանդության երկարաժամկետ հետեւանքների հետ. որոշ նոր ախտանիշներ դրսեւորվում են ապաքինումից մի քանի ամիս անց: Ախտանիշներից մեկը մազաթափությունն է:

Վերջին ամիսներին շատ հաղորդագրություններ են հայտնվում այն մասին, որ կորոնավիրուսի հետեւանքներից մեկը հոտառության կորստի, հազի եւ թուլության հետ մեկտեղ կարող է լինել ճաղատացումը: Այս մասին հայտնել են Ճապոնիայի բժշկական եւ գլոբալ առողջապահական ազգային կենտրոնի գիտնականները: Հետազոտություն է անցկացվել 63 պացիենտի, 9 տղամարդու եւ 5 կնոջ շրջանում, ովքեր հայտնել են մազաթափության մասին կորոնավիրուսի ախտանիշների հայտնվելուց 2 ամիս անց:

Medportal.ru-ի հաղորդմամբ՝ բժիշկ-տրիխոլոգ Գրիգորի Աբրամովը կարծիք է հայտնել, որ ճաղատացման կարող է հանգեցնել ոչ թե հենց վիրուսը, այլ ուժեղ սթրեսը, որի հետ բախվում է վարակվածը: Մասնագետի խոսքով՝ կորոնավիրուսը մարդու օրգանիզմի վրա ունի ինչպես ուղիղ, այնպես էլ անուղղակի ազդեցություն, եւ այդ մեխանիզմը դեռեւս մինչեւ վերջ ուսումնասիրված չէ, սակայն հայտնի է, որ մազաթափությունը աուտոիմուն պրոցես է:

«Իմունիտետը ազդում է մեր վահանաձեւ գեղձի, հոդերի, մազերի վրա եւ շատ այլ օրգանների վրա»,-ասել է Աբրամովը:

Բժիշկը բոլորին, ովքեր բախվել են հիվանդությունից հետո ճաղատացման հետ, խորհուրդ է տալիս որքան հնարավոր է շուտ դիմել ոչ միայն մաշկաբանի եւ տրիխոլոգի, այլ նաեւ իմունաբանի օգնությանը:

Քլիվլենդից մաշկաբանների կողմից հրապարակված զեկույցի համաձայն՝ կորոնավիրուսից հետո մազաթափությունը կարող է առաջանալ տելոգենային ալոպեցիայի պատճառով: Դա ժամանակավոր վիճակ է, երբ կարող է առաջանալ նաեւ ուժեղ սթրեսի եւ հոգեբանական տրավմայի պատճառով:

Դեռ չկան հստակ տվյալներ այն մասին, թե կորոնավիրուսից ապաքինված քանի մարդ է բախվել մազաթափության խնդրի հետ, սակայն տարբեր երկրներից հաղորդագրություններ են տարածվում, որ այդ խնդիրը բավականին տարածված է: