Գերմանիայի ԱԳ նախարարը հայտնել է, որ Բեռլինը հանդես է եկել Եվրոպայի խորհուրդ Ռուսաստանի լիակատար վերադարձի օգտին
Գերմանիան Եվրոպայի խորհրդի կոմիտեում իր նախագահության շրջանում մտադիր է այս կազմակերպությունը վերածել աշխարհամասում մարդու իրավունքների պաշտպանի կազմակերպության։ Այս մասին այսօր հրապարակված Funke մեդիախմբի հետ հարցազրույցում ասել է Գերմանիայի ԱԳ նախարար Հայկո Մաասը։
«Մեր նախագահության շրջանում մենք ցանկանում ենք Եվրոպայի խորհուրդը դիրքավորել որպես Եվրոպայում մարդու իրավունքների պաշտպանի։ Ուստի Գերմանիան, չնայած դիմադրությանը, հանդես է եկել Եվրոպայի խորհուրդ Ռուսաստանի լիակատար վերադարձի օգտին»,- ասել է Մաասը՝ հավելելով․ «Այն, թե որքան ուժգին կարող է Եվրոպայում տուժել ժողովրդավարությունը, մարդու իրավունքները եւ իրավական պետության սկզբունքները, բայց Եվրոպայի խորհրդից դուրս, հիմա ստիպված ենք տեսնել Բելառուսում»։
Նրա կարծիքով՝ Եվոպայի խորհուրդը կարող է կարեւոր դեր խաղալ ոչ միայն մարդու իրավունքների պաշտպանության գործում, այլեւ արհեստական ինտելեկտի զարգացման ու օգտագործման կարգավորման մեջ, որի կիրառման ժամանակ կենտրոնական նշանակություն ունեն մարդն ու մտավոր իրավունքները։ Նրա կարծիքով՝ «թվային տարածքը չպետք է վերածվի վախի եւ ատելության տարածքի»։ Մաասը շեշտել է, որ Գերմանիան մտադիր է ուշադրությունը կենտրոնացնել փոքրամասնությունների պաշտպանության վրա, մասնավորապես գնչուների, նրանց վիճակի՝ որպես «Եվրոպայում ամենախոշոր փոքրամասնության»։
Այսօր կես տարով Հունաստանից Գերմանիային է անցնում Եվրոպայի խորհրդի Նախարարների կոմիտեում նախագահությունը։ Այս կապակցությամբ Գերմանիայի ԱԳՆ-ից նշել են, որ Գերմանիան գլխավոր դեր է հատկացնում Մարդու իրավունքների եվրոպական կոնվենցիային եւ Մարդու իրավունքների եվրոպական դատարանին (ՄԻԵԴ), որի վարույթում են ավելի քան 60 հազար գործեր, որոնց 40 տոկոսը կապված է Թուրքիայի եւ Ռուսաստանի հետ։
«Մենք, իհարկե, քննադատաբար ենք վերաբերվում ազգային օրենսդրությունը վեր դասելու որոշ երկրների ձգտմանը։ Գերմանիան հանդես է եկել ԵԽԽՎ Ռուսաստանի վերադարձի օգտին, այդ թվում՝ նաեւ ՄԻԵԴ-ին ՌԴ քաղաքացիների հասանելիություն ունենալու անհրաժեշտության պատճառով»,- պնդում են Գերմանիայի ԱԳՆ-ից։
2019 թվականի հունիսին ԵԽԽՎ-ն բանաձեւ էր ընդունել, որով կանոնակարգում ամրագրվում են նորմեր, որ «քվեարկելու, ելույթ ունենալու եւ վեհաժողովում կամ դրա մարմիններում ներկայացված լինելու իրավունքները կարող են դադարեցվել կամ հետ կանչվել վիճարկման կամ լիազորություններ վերանայման միջոցով»։ Հենց այս փաստաթուղթն է նշանավորել փոխհարաբերություններում հնգամյա ճգնաժամից հետո ՌԴ վերադարձը ԵԽԽՎ։ Ռուս խորհրդարանականները բազմիցս նշել էին, որ հենց այս հիմնարար լիազորություններն են երաշխավորում պառլամենտարիզմի բուն էությունը, եւ որ միայն ընտրողներն են կարող նրանց զրկել իրենց լիազորություններից։