COVID-19-ը երկու անգամ ավելի մահացու է գրիպից պացիենտների համար, որոնց մոտ կորոնավիրուսը ծանր է ընթանում
Գիտնականները հերքել են այն միֆը, որ կորոնավիրուսը գրիպից վտանգավոր չէ: COVID-19-ը երկու անգամ ավելի մահացու է գրիպից պացիենտների համար, որոնց մոտ կորոնավիրուսը ծանր է ընթանում՝ պարզել են Վաշինգտոնի համալսարանի բժշկական դպրոցի գիտնականները:
Հետազոտության մեջ համեմատվել են հունվարի 1-ից ապրիլի 15-ը ինտենսիվ թերապիայի բաժանմունքներում հոսպիտալացված կորոնավիրուսով վարակված 65 պացիենտների եւ գրիպով վարակված 74 պացիենտների կլինիկական ցուցանիշներն ու մահացության մակարդակը: Ինչպես պարզվել է, պացիենտների շրջանում մահացությունը, որոնք հիվանդանոցում են հայտնվել կորոնավիրուսով ծայրահեղ ծանր վիճակում, երկու անգամ մեծ է՝ 40 տոկոս 19 տոկոսի դիմաց: Այդ տարբերությունը հեղինակները բացատրում են նրանով, որ կորոնավիրուսի դեպքում սուր շնչառական դիսթրես համախտանիշը զարգանում է ավելի հաճախ, քան գրիպի ժամանակ՝ 63 տոկոս 26 տոկոսի դիմաց:
Medportal.ru-ի հաղորդմամբ՝ կորոնավիրուսով վարակված պացիենտները սովորաբար հիվանդանոցում են հայտնվում ավելի ուշ, քան գրիպով վարակվելու դեպքում. միջինում ախտանիշների հայտնվելուց հետո 7 օր անց: Սակայն հոսպիտալացման պահին նրանց մոտ ավելի շատ ախտանիշներ կան, քան գրիպով վարակվածների մոտ. երկու խմբից մարդկանց 40 տոկոսի մոտ բարձր ջերմությամբ ուժեղ տենդ է նկատվել:
Գրեթե բոլոր հոսպիտալացվածների մոտ (92 տոկոս) ախտորոշվել է երկկողմանի թոքաբորբ, այն դեպքում, երբ գրիպի ծանր ընթացքի ժամանակ այդ ցուցանիշը կազմել է 64 տոկոս:
Նշենք, որ այդ հետազոտությունն անցկացվել է գարնանը, երբ բժիշկների զինանոցում կար միայն հիդրօքսիքլորոքինը, որից հետագայում հրաժարվեցին: Այժմ կիրառվում են ավելի շատ միջոցներ, այդ թվում՝դեքսամետազոն, որը բարձր արդյունավետություն է ցուցաբերել կորոնավիրուսի ժամանակ մահացության եւ բարդացումների ռիսկի նվազեցման գործում:
Սակայն դա առաջին հետազոտությունը չէ, որը ցույց է տվել, որ կորոնավիրուսը «պարզապես գրիպ չէ»: CDC-ի վերջին զեկույցում 4000 պացիենտների տվյալներ են ներկայացվել, որոնք կորոնավիրուսով հոսպիտալացվել են մարտից մայիս ամիսներին, ինչպես նաեւ 5400 պացիենտների տվյալներ, որոնք հոսպիտալացվել են գրիպի ծանր ընթացքում 2018-ի հոկտեմբերից մինչեւ 2020-ի փետրվար: Երկու խմբերում վարակվածների միջին տարիքը՝ 69-70 տարեկան:
Կորոնավիրուսից մահացել է պացիենտների 21 տոկոսը, այն դեպքում, երբ գրիպից մահացությունն ավելի երկար ժամանակահատվածում կազմել է 4 տոկոս: Բացի այդ, բարդացումների ռիսկը, որոնց դեպքում հոսպիտալացում է պահանջվում ինտենսիվ թերապիայի բաժանմունքում, կորոնավիրուսի դեպքում 2 անգամ մեծ է եղել, քան գրիպի դեպքում, իսկ հիվանդանոցում մնալու տեւողությունը՝ գրեթե 3 անգամ ավելի երկար: