Ռուսաստանի ՕՏՈՒ-ն մեկ օրում 64 միավոր տեխնիկա է տեղափոխել Լեռնային Ղարաբաղում տեղակայված ռուս խաղաղապահների համար

Ռուսական Իլ-76 և Ան-124 ռազմատրանսպորտային օդանավերը մեկ օրում Հայաստան են տեղափոխել 64 միավոր ավտոմեքենաներ եւ հատուկ տեխնիկա, այդ թվում՝ զրահափոխադրիչներ, բեռնատարներ։ Այս մասին հայտնել են ՌԴ պաշտպանության նախարարության մամուլի ծառայությունից։

«Ռուսաստանի ՕՏՈՒ ռազմատրանսպորտային ավիացիայի Իլ-76 եւ Ան-124 օդանավերը Արեւելյան Ուլյանովսկ օդանավակայանից մեկ օրում կատարել են 22 չվերթ։ Հայաստան են տեղափոխել 64 միավոր ավտոմեքենաներ եւ հատուկ տեխնիկա՝ զրահափոխադրիչներ, մեծ անցանելիության բեռնատարներ, ավտոցիստեռններ, էքսկավատորներ եւ նյութատեխնիկական մատակարարման այլ տեխնիկա»,- ասել են ռազմական գերատեսչությունից։

Անձնակազմը եւ օդանավերից բեռնաթափվելուց հետո ռազմական տեխնիկան շարասյուներ են կազմելու Լեռնային Ղարաբաղ անցնելու համար։ «Շարասյան ճանապարհի երթուղու պաշտպանությունը օդից իրականացնում են Մի-8 եւ Մի-24 ուղղաթիռները»,- հստակեցրել են ՌԴ պաշտպանության նախարարությունից։

Նոյեմբերի 9-ին Ռուսաստանի նախագահ Վլադիմիր Պուտինը, Ադրբեջանի նախագահ Իլհամ Ալիեւը եւ Հայաստանի վարչապետ Նիկոլ Փաշինյանը ստորագրել են համատեղ հայտարարություն՝ Լեռնային Ղարաբաղում ռազմական գործողությունների ամբողջական դադարեցման մասին: Ռուսաստանի ղեկավարի խոսքով՝ ադրբեջանական եւ հայկական կողմերը կմնան իրենց զբաղեցրած դիրքերում, իսկ տարածաշրջանում կտեղակայվեն ռուս խաղաղապահներ:

ՌԴ պաշտպանության նախարարության տեղեկացմամբ՝ զորակազմի հիմքը կազմելու են Կենտրոնական ռազմական օկրուգի 15-րդ առանձին մոտոհրաձգային բրիգադի (խաղաղապահ) ստորաբաժանումները։ Գերատեսչությունից հստակեցրել են, որ հրադադարի մասին պայմանավորվածության կատարման վերահսկման նպատակով դիտակետեր են տեղակայվելու Լեռնային Ղարաբաղում շփման գծի ամբողջ երկայնքով եւ Լաչինի միջանցքի երկայնքով, որն ապահովում է Հայաստանի եւ Լեռնային Ղարաբաղի կապը։ Խաղաղապահ գործողության հրամանատարությունը տեղակայվելու է Ստեփանակերտի շրջանում։