Հրաժարականի դիմում է ներկայացրել նաև հատուկ հանձնարարություններով դեսպան Կարեն Միրզոյանը
Ցրված սկլերոզի բուժման մեջ օգտագործվող բետա-1a իտերֆերոնի փորձարարական տարբերակը (SNG001 ինհալյացիոն դեղամիջոց) զգալի արդյունավետություն է ցուցադրել COVID-19-ով հոսպիտալացված պացիենտների բուժման մեջ։ Դեղամիջոցը 79 տոկոսով նվազեցրել է ծանր ընթացքի եւ մահացության հավանականությունը։
Synairgen ընկերության դեղամիջոցի արդյունավետությունը COVID-19-ի բուժման մեջ հետազոտել են Մեծ Բրիտանիայից գիտնականները, եւ կլինիկական փորձարկումների II փուլի ժամանակ, որի արդյունքները հրապարակվել են The Lancet Respiratory Medicine-ում, այս դեղամիջոցը 79 տոկոսով նվազեցրել է հիվանդության ծանր ընթացքը եւ կորոնավիրուսի հետեւանքով մահացությունը։ Նախկինում ինտերֆերոնի այս տեսակը կիրառվում էր ցրված սկլերոզի դեպքում նյարդային համակարգի վնասման եւ բորբոքման նվազեցման համար։
Հետազոտության մեջ ընդգրկվել է 101 պացիենտ, որոնցից 48-ը ստացել է SNG001 դեղամիջոցը, մնացածը՝ պլացեբո։ Թթվածնային աջակցության կարիք է ունեցել 66 պացիենտ։ Փորձարարական բուժում ստացող պացիենտների վիճակը 15 օր հետո, ըստ ԱՀԿ կլինիկական բարելավման սանդղակի (OSCI), 2 անգամ ավելի լավ է եղել, քան չստացողների վիճակը, իսկ 28 օր հետո՝ 3 անգամ ավելի լավ։ Այս սանդղակով 0 նիշը համապատասխանում է հիվանդության բացակայությանը, իսկ 8 նիշը՝ մահվանը։
Ընդ որում՝ հետազոտողները խմբերի հիվանդանոցից դուրս գրվելու ժամկետների միջեւ զգալի տարբերություն չեն հայտնաբերել։
Հետազոտության ժամանակ մահացել է 3 պացիենտ, եւ բոլորը եղել են պլացեբոյի խմբում։ Պլացեբո ստացող հիվանդներից 22 տոկոսի մոտ զարգացել է COVID-19-ի ծանր ընթացք, մինչդեռ SNG001 խմբում եղել է 13 տոկոս։ Գիտնականները նաեւ նշել են դեղամիջոցի լավ տանելիությունը, կողմնակի էֆեկտներից ամենատարածվածը գլխացավն է եղել։
Հետազոտության հեղինակների խոսքով՝ այս հուսադրող արդյունքները ծանրակշիռ հիմք են տալիս պացիենտների մեծ ընտրությամբ ավելի մեծածավալ միջազգային հետազոտությունների համար։