«Արայիկ Հարությունյանը ո՞ր երկրի նախագահն է». Հադրութցիների բողոքի ակցիան՝ Բաղրամյան 26-ի դիմաց (Տեսանյութ)

Հադրութցիները «Վերադարձրեք Հադրութը» պաստառներով բողոքի ակցիա են իրականացնում ՀՀ նախագահի ստավայրի դիմաց՝ Բաղրամյան 26: Ակցիային մասնակցում են նաեւ նրանց երեխաները, որոնք նշում են, որ ուզում են վերադառնալ իրենց տուն:

Ակցիայի մասնակիցներից մեկը՝ «Միացյալ Հայաստան» կուսակցության անդամ (ղեկավարը Վահան Բադասյանն է) Ադելա Աղաջանյանը, լրագրողների հետ զրույցում ասաց. «Մենք նախ ուզում ենք, որ Հադրութը վերադաձվի, նաեւ ինչ-որ ձեւով այս ստորագրված խայտառակ փաստաթուղթը չեղյալ հայտարարվի: Ի՞նչ է նշանակում Շուշին թողնել նրանց: Ստեփանակերտցին ո՞նց ապրի: Կամ Մարտունի մի մասը չկա, այդ տարածքներում ադրբեջանցիների պոստերն են: Հետո ի՞նչ, որ կա խաղաղապահի զորք, այդ զորքը հո չի՞ հսկելու ամեն մի ընտանիքի անվտանգությունը: Հիմա Արայիկ Հարությունյանը չգիտեմ, այսօր էլ է նախագա՞հ: Ո՞ր երկրի նախագահն է, ում նախագահն է: Հիմա այսօր նա հայտարարում է՝ վերադարձեք Արցախ, եւ երեկ ճանապարհին Ստեփանակերտ-Մարտունի հատվածում 4 հոգի գերի են ընկնում, որտե՞ղ է նվտանգությունը, ես ինչպե՞ս տանեմ իմ երեխաներին: Ես ուզում եմ Արայիկ Հարությունյանին հարց տալ՝ քո աղջիկները հիմա Ստեփանակերտո՞ւմ են: Դու պատրաստվո՞ւմ եք քո աղջիկներին մեծացնել Ստեփանակերտում, երբ ադրբեջանցին Շուշիում է: Ես այս պայմաններում չեմ կարող վերադառնալ Ստեփանակերտ: Չեմ կարող ամեն առավոտ լսել մուղամի ձայները»:

Ակցիայի մասնակիցները վանկարկում էին. «Վերադարձրեք Հադրութը», «Վերադարձրեք իմ տունը», «Հադրութը պատմական Դիզակն է», «Պահանջում ենք Հադրութի դեօկուպացիա»: