Թբիլիսիի կենտրոնում հանաքվել են հազարավոր մարդիկ՝ ի նշան բողոքի ընտրակեղծիքի դեմ
Հազարավոր մարդիկ են հավաքվել Վրաստանի խորհրդարանի շենքի մոտ Թբիլիսիի կենտրոնում, որպեսզի բողոքարկեն հոկտեմբերի 31-ին կայացած ընտրությունների արդյունքները, հաղորդում է Նովոստի-Գրուզիա-ն:
Քաղաքի կենտրոնում ավտոմեքենաների շարժումը կանգնեցվել է: Խորհրդարանի շենքի մերձակայքում Ռուսթավելի պողոտան լի է ցուցարարներով: Դեռեւս խոսնակները չեն դիմել հավաքվածներին: Ակնկալվում է, որ այսօր կուսակցությունները կներկայացնեն հուշագրի տեքստ, որտեղ նշված կլինի խորհրդարանական ընտրությունների շուրջ նրանց համընդհանուր դիրքորոշումը:
Քաղաքական գործիչները նախապես հավաքել էին իրենց կողմնակիցներին Թբիլիսիի տարբեր թաղամասերից, որից հետո կազմակերպել էին քայլերթ դեպի ակցիայի անցկացման վայրը: Հանրահավաքում նկատվում են դրոշներն այն քաղաքական միավորումների, որոնք երբեք նախկինում չեն համագործակցել միմյանց հետ:
Վրաստանի շրջաններից բնակիչներ են միացել հանրահավաքին: Մայրաքաղաք են ժամանել մեքենաներ Քութաիսիից, Փոթիից, Գորիից եւ այլ քաղաքներից:
Այսօրվա հանրահավաքի եւս մեկ միտումը մեծաթիվ ամերիկյան դրոշներն են: Ըստ ամենայնի՝ այդկերպ ակցիայի մասնակիցներն արձագանքում են ԱՄՆ-ում նախագահական ընտրություններին:
Ինչպես հաղորդել են կազմակերպիչները, ակցիայի բոլոր մասնակիցները կրում են պաշտպանիչ դիմակներ:
Հանրահավաքի կազմակերպման մեջ ներգրավվել է գրեթե ողջ ընդդիմադիր սպեկտրը, այդ թվում՝ տասնյակ կուսակցությունները:
Ընդդիմությունը չի ճանաչում ընտրությունների լեգիտիմությունը: Բոլոր ութ ընդդիմադիր կուսակցությունները, որոնք ներառվել են տասներորդ գումարման խորհրդարանում, հրաժարվում են իրենց մանդատներից եւ պահանջում նոր քվեարկության անցկացում: Քաղաքական գործիչները հայտարարել են անժամկետ բողոքի ցույցերի մասին նոյեմբերի 1-ին:
Համաձայն ԿԸՀ նախնական տվյալների՝ ձայների մեծամասնությունը ստացել է «Վրացական երազանք» իշխող կուսակցությունը՝ 48.23 տոկոս: Երկրորդ արդյունքը պատկանում է «Ազգային շարժում՝ Միասնության ուժ» ընդդիմադիր կոալիցիային՝ 27.17 տոկոս: