Հովհաննես Դավթյան․ Ֆերդինանդ Կարապետյանի մասնակցությունը ԵԱ-ին հարցականի տակ է

Պրահայում տեղի ունենալիք ձյուդոյի Եվրոպայի առաջնությունն օլիմպիական վարկանիշների համար կարեւոր փուլ է լինելու, բայց Ֆերդինանդ Կարապետյանի մասնակցությունը հարցականի տակ է: Կորոնավիրուսի համավարակով եւ ռազմական դրությամբ պայմանավորված երկրից դուրս գալու հետ կապված խնդիրներ կան:

Այս մասին NEWS.am Sport-ի թղթակցի հետ զրույցում ասաց ձյուդոյի տղամարդկանց Հայաստանի հավաքականի գլխավոր մարզիչ Հովհաննես Դավթյանը:

Չեխիայի մայրաքաղաք Պրահայում նոյեմբերի 19-21-ը տեղի կունենա ձյուդոյի Եվրոպայի առաջնությունը, որն վարկանիշային է Տոկիոյի Օլիմպիական խաղերի համար:

Ազգային հավաքականից Պրահայում հանդես է գալու միայն 2018 թվականի Եվրոպայի չեմպիոն, 73 կգ քաշային Ֆերդինանդ Կարապետյանը, որը Տոկիոյի Օլիմպիական խաղերի ուղեգիր նվաճելու հնարավորություն ունեցող Հայաստանի միակ ձյուդոիստն է:

2020 թվականի հունվարին Թել Ավիվում տեղի ունեցած Գրան Պրի վարկանիշային մրցաշարում արծաթե մեդալ նվաճելուց եւ բարձր միավորներ վաստակելուց հետո վնասվածքի պատճառով Կարապետյանը ստիպված եղավ բաց թողնել փետրվարին Փարիզում նախատեսված վարկանիշային մրցաշարը: Դրանից հետո, աշխարհում սկիզբ առած կորոնավիրուսի համավարակով պայմանավորված, հետագա բոլոր վարկանիշային մրցաշարերը չեղարկվեցին:

Մինչեւ կորոնավիրուսի պանդեմիայի տարածումը եւ արտակարգ դրությունը, ձյուդոիստին մնացել էր ընդամենը մեկ վարկանիշային մրցաշար Օլիմպիական խաղերի ուղեգրի համար համապատասխան միավորները լրացնելու համար:

Հավաքականի գլխավոր մարզիչ Հովհաննես Դավթյանը նշում է, որ Ֆերդինանդ Կարապետյանի համար Եվրոպայի առաջնությունը կարեւոր է վարկանիշային միավորների առումով եւ մասնակցությունը խիստ անհրաժեշտ:

«Ձյուդոյի մեծահասակների Եվրոպայի առաջնությունը անցկացվելու է, բայց մեր մասնակցությունը հարցականի տակ է: Մասնակցության հետ կապված հարցերն ընթացքի մեջ են: Այս պահին հստակ չեմ կարող ասել՝ մեկնելու ենք, թե ոչ: Պատճառը կորոնավիրուսով եւ ռազմական դրությամբ պայմանավորված երկրից դուրս գալու խնդիրն է:

Մենք պատրաստվում ենք առաջնությանը, որովհետեւ միակ խոչընդոտը դա է, որը հնարավոր է՝ լուծվի: Մինչեւ նոյեմբերի 12-13-ը վերջնական պարզ կլինի:

Այս օրերին հավաքի մեջ ենք Գյումրիում: Սա արդեն մեր թվով երրորդ հավաքն է Եվրոպայի առաջնությանն ընդառաջ: Կարեւոր մրցում է լինելու Ֆերդինանդ Կարապետյանի համար: Մեկնելու ենք Պրահա ոչ միայն վարկանիշների, այլեւ մեդալ նվաճելու համար: Այս Եվրոպայի առաջնությունը օլիմպիական վարկանիշների համար կարեւոր փուլերից մեկն է համարվելու»,- ասաց Հովհաննես Դավթյանը:

Ըստ գլխավոր մարզիչի, կարանտինի ընթացքում Եվրոպայի չեմպիոնը կարողացել է պահպանել լավ մարզավիճակ:

«Այս պահին Ֆերդինանդն ունի լավ մարզավիճակ: Տարեսկզբին նա արդեն իրեն դրսեւորեց, ուներ լավ մարզավիճակ եւ Թել Ավիվում անցկացված Գրան պրի մրցաշարում դարձավ արծաթե մեդալակիր, այն էլ վնասվածքի պատճառով: Դրանից հետո կարանտինի ընթացքում նա ոչ մի օր կանգ չի առել, մարզվել է, կարողացել է հնարավորինս պահել մարզավիճակը: Մարզադահլիճային մարզումներ չենք ունեցել երկար ժամանակ, բայց մշտապես կապի մեջ ենք եղել, անհատական մարզումները վերահսկվել են առաջադրանքներով, հանձնարարություններով եւ այսօր ունենք լավ վիճակ ու դեռ ավելացնում ենք: Այսինքն՝ զրոյից սկսելու խնդիր չենք ունեցել Ֆերդինանդի հետ: Նա շատ լավ է աշխատել այս ամբողջ ընթացքում»,- նշեց Հովհաննես Դավթյանը:

Թիմի գլխավոր մարզիչը տեղեկարցեց, որ օլիմպիական վարկանիշները նոր կարգով են հաշվարկվելու՝ պայմանավորված բազմաթիվ վարկանիշային մրցաշարերի չեղարկվելով:

«Հաշվի առնելով կորոնավիրուսով պայմանավորված իրավիճակն աշխարհում, օլիմպիական վարկանիշների համար նոր կարգ է սահմանվելու եւ դրանով հաշվարկվելու: Շատ մրցումներ չեղարկվեցին, հետաձգվեցին, մի քանիսը տեղի ունեցան, բայց շատ երկրներ չկարողացան մասնակցել: Միջազգային ֆեդերացիան նոր կարգ է հաստատելու:

Այս Եվրոպայի առաջնությունով այս տարվա մրցելույթները կավարտենք: 2021 թվականի մրցումային տարվա եւ մինչեւ Օլիմպիական խաղեր վարկանիշային մրցաշարերի անցկացման ժամկետները դեռ չունենք:

Սա իմ առաջին խոշոր մրցաշարն է լինելու հավաքականի գլխավոր մարզիչի պաշտոնում: Ավելի բարդ է լինել գլխավոր մարզիչ, քան մարզիկ: Պատասխանատվությունը կրկնակի մեծ է: Հուսամ՝ պատվով ելույթ կունենանք եւ մեդալով կվերադառնանք, եթե մեր մեկնելու խնդիրը լուծվի:

Պրահա կմեկնենք ես եւ Ֆերդինանդը»,- շեշտեց գլխավոր մարզիչը:

Հարցին, թե ինչու է հավաքականում Եվրոպայի առաջնությանը մասնակցելու հնարավորություն ստացել միայն Ֆերդինանդ Կարապետյանը, Դավթյանը մանրամասնեց.

«Կունենանք միայն մեկ ներկայացուցիչ, քանի որ հավաքականը նոր ձեւավորված կազմով է այժմ հանդես գալիս: Բոլորը երիտասարդ մարզիկներ են, որոնք դեռեւս փորձ չունեն մեծահասակներում նման կարեւոր մրցաշարերում: Խնդիրն այսպես է դրված՝ մինչեւ պատրաստ, մեդալին մոտ մարզիկ չունենանք, նպատակահարմար չենք գտնում մեծ կազմով ներկայանալու: Այս երիտասարդները դեռ որեւէ միջազգային մրցաշարի չեն մասնակցել, դեռ չունենք հնարավորություն նրանց փորձարկելու միջազգային մրցահարթակում համավարակով պայմանավորված: Չեմ ցանկանում այս տղաներին տանել Եվրոպայի առաջնության զուտ մասնակցության համար: Երբ զգանք՝ ունենք քաշային կարգերում ներկայացուցիչներ, որոնք մոտ են մեդալներին, մրցանակային տեղերին, նրանք վստահ կստանան հնարավորություն մեկնել Եվրոպայի, աշխարհի առաջնությունների»:

Հիշեցնենք, որ Արցախյան ռազմաճակատում ընթացող մարտերում հոկտեմբերի 19-ին քաջաբար զոհվել էր Հայաստանի ձյուդոյի ֆեդերացիայի ՀՀ երիտասարդների հավաքականի անդամ Գոռ Սարգսյանը: Հավաքականի գլխավոր մարզիչը հայտնեց, որ Գոռ Սարգսյանը զորակոչվելուց առաջ արդեն մեծահասակների հավաքական էր ընդգրկվել:

«Գոռը մեր հավաքականի անդամ էր: Նոր էր տեղափոխվել մեծահասակներ, բայց զորակոչվեց բանակ եւ չհասցրեց մասնակցել միջազգային մրցաշարերին: Միայն Հայաստանի առաջնություններում է ելույթներ ունեցել:

Այս պահին հավաքականի անդամներից չունենք տղաներ առաջնագծում:

Դժվար է այս իրավիճակում կենտրոնանալ մարզումների վրա: Բոլորի պես մենք էլ մեր մտքերով Արցախում ենք, սահմանին կռվող զինվորների հետ: Ամեն դեպքում հնարավորինս փորձում ենք կազմակերպել մարզումները, պատրաստվել Եվրոպայի առաջնությանը»,- ասաց Հովհաննես Դավթյանը:

Ձյուդոյի Եվրոպայի առաջնությունը մեկնարկում է նոյեմբերի 19-ին, Ֆերդինանդ Կարապետյանը տատամի դուրս կգա նոյեմբերի 20-ին: