Գիտնականները համեմատել են կորոնավիրուսի վտանգը տղամարդկանց և կանանց համար
Տղամարդկանց մոտ կորոնավիրուսային վարակը ավելի հաճախ է ընթանում բարդություններով, քան կանանց մոտ: Այս եզրակացությանն են հանգել The Wall Street Journal-ում՝ վերլուծելով վիճակագրական առկա տվյալները:
Այսպես, ԱՄՆ-ում տղամարդկանց բաժին է ընկնում COVID-19-ից մահացության 54%-ը, ընդ որում՝ 30-60 տարիքային խմբում այս ցուցանիշը բարձրանում է մինչեւ 66%:
Հիվանդությունների կանխարգելման եւ վերահսկման եվրոպական կենտրոնի մասնագետները համաձայն են, որ կորոնավիրուսն իսկապես ավելի վտանգավոր է տղամարդկանց համար: 40-69 տարեկան մահացածների շրջանում 73%-ը տղամարդիկ են: Բացի այդ, նրանց բաժին է ընկնում այս խմբի հոսպիտալացումների 62%-ը եւ առավել ծանր վիճակում գտնվող պացիենտների գրեթե երեք քառորդը:
Ինչպես տեղեկացվում է Լոնդոնի համալսարանական քոլեջի «Սեռ, գենդեր եւ COVID-19» տվյալների բազայում, որն ընդգրկում է 183 երկրների վիճակագրությունը, տղամարդկանց մոտ կորոնավիրուսով վարակվելու 11 դեպքի դիմաց կանանց մոտ 10 դեպք է լինում: Միեւնույն ժամանակ, COVID-19-ից մահացության դեպքերի համար այս հարաբերակցությունը 14-ը 10-ի է:
Ավելի վաղ գիտնականները պարզել էին, որ տեստոստերոնը կարող է լինել տղամարդկանց շրջանում կորոնավիրուսից բարձր մահվան հիմնական պատճառը: Մասնագետները բացատրել են, որ տղամարդու հիմնական սեռական հորմոնը կարող է նպաստել, որ վիրուսը ներթափանցի օրգանիզմի բջիջների մեջ: Հենց սա է, հավանաբար, պատճառը, որ հնարավոր է, որ տղամարդիկ գրեթե երկու անգամ ավելի հաճախ են մահանում հիվանդությունից, քան կանայք: