Ադրբեջանական զինված ուժերի ցամաքային և հետևակային պոտենցիալը կոտրված լինելը չի նշանակում, թե չի շարունակվելու հարձակումը. Արծրուն Հովհաննիսյան

Ադրբեջանական զինված ուժերի ցամաքային և հետևակային պոտենցիալը կոտրված լինելը չի նշանակում, թե չի շարունակվելու հարձակումը։ Այս մասին «Ազատության» հետ զրույցում ասել է ՀՀ ՊՆ ներկայացուցիչ Արծրուն Հովհաննիսյանը՝ պատասխանելով ֆեյսբուքյան օգտատերերի հարցին, թե ի՞նչ է նշանակում «հակառակորդի մեջքը կոտրված լինել»։

«Խոսքը հակառակորդի ցամաքային զորատեսակների հետևակային և զրահատանկային խմբավորումների մասին է։ Օրինակ՝ հակառակորդի հրետանային զորքերն ավելի քիչ կորուստներ են կրել, քան հետևակը։ Խոսքը նրա մասին չէ, որ նրանք այնքան թույլ են, որ չեն հարձակվելու, հենց հիմա էլ Մարտունիի ուղղությամբ մարտեր են։ Կհարձակվեն վարձկաններով, թուրքական ստորաբաժանումների ղեկավարությամբ և այլն»,- ասել է ՊՆ ներկայացուցիչը։

Արծրուն Հովհաննիսյանի խոսքով՝ վարձկանների դերակատարությունը գնալով մեծանալու է. «Ադրբեջանը հենվելու է վարձկան ուժերի վրա։ Մեր տեսադաշտում արդեն ավելի քիչ է հայտնվում ծանր զրահատեխնիկա, ավելի շատ փոքր մեքենաներ են, որոնք ավելի շատ վարձկանների մարտավարությանն են մոտ»։