Ինչու չեն մեկնել, և կմեկնե՞ն Լևոն Տեր-Պետրոսյանն ու Ռոբերտ Քոչարյանը

Վարչապետի խոսնակ Մանե Գևորգյանը՝ ի պատասխան լրատվամիջոցների հարցումների, անդրադարձել է անցնող օրերին հայկական մամուլու շոշափված թեմայի, որը վերաբերում է Հայաստանի և Արցախի նախկին նախագահներին: Մանե Գևորգյանը նշել է, որ Արցախի նախկին նախագահներ Բակո Սահակյանն ու Արկադի Ղուկասյանը հոկտեմբերի 20-ին Հայաստանի վարչապետ Նիկոլ Փաշինյանի հետ հանդիպմանը ասել են, որ ՀՀ առաջին և երկրորդ նախագահներ Լևոն Տեր-Պետրոսյանը և Ռոբերտ Քոչարյանը ցանկանում են մեկնել Մոսկվա՝ ռուսական էլիտայի ներկայացուցիչների հետ ԼՂ շուրջ ստեղծված իրավիճակը քննարկելու և քննարկումների արդյունքում Հայաստանի կառավարությանը ստեղծված իրավիճակից կոնկրետ լուծումներ առաջարկելու համար:

ԼՂՀ պաշտոնաթող նախագահները առաջարկել են, որ հնարավոր այցի արդյունքները քննարկվեն Հայաստանի և ԼՂՀ նախկին և ներկա ղեկավարների հանդիպման ժամանակ: Վարչապետ Փաշինյանը, ընդգծելով, որ չի կարող խոչընդոտ հանդիսանալ ի նպաստ Հայաստանի և Արցախի հնարավոր որևէ քայլի՝ համաձայնել է առաջարկությանը: Մանե Գևորգյանը նշել է, սակայն, որ, իրենց տեղեկությամբ, Տեր-Պետրոսյանն ու Քոչարյանն առ այսօր չեն մեկնել Հայաստանից: Վարչապետի խոսնակի անդրադարձը հետաքրքիր է, այն էլ փաստորեն իրադարձությունների ծավալումից տասն օր անց:

Ավելին, փաստորեն ընդգծվում է կամ ուշադրություն հրավիրվում հանգամանքի վրա, որ տասն օր առաջ դիմել են վարչապետին նախաձեռնությամբ, ստացել հավանություն, սակայն չեն շարունակել այն: Ըստ այդմ` առաջանում է հարց, թե ինչո՞ւ չեն մեկնել առաջին և երկրորդ նախագահները Մոսկվա, եթե հայտնել են պատրաստակամություն և ստացել համաձայնություն վարչապետ Փաշինյանից:

Ինչպես հայտնի է, Բակո Սահակյանի և Արկադի Ղուկասյանի՝ Փաշինյանի հետ հանդիպումից հետո եղավ Հայաստանի և Արցախի նախկին բոլոր նախագահների մասնակցությամբ ընդհանուր հանդիպում: Արդյո՞ք դրանում խոսակցությունն ընթացել է այնպես, որ չեղարկվել է Մոսկվա մեկնելու որոշումը: Թե՞ խնդիրն այլ է, և այդ մեկնումը իրականում լինելու էր ոչ թե Հայաստանին ու Արցախին օգնելու, այլ պարզապես Հայաստանում իշխանափոխության հարց լուծելու համար, և մեկնում տեղի չի ունեցել, քանի որ չի ստացվել այդ հարցը լուծելու բավարար ազդակ Մոսկվայից: Համենայնդեպս պետք է նկատել, որ հայկական մամուլում իրավիճակը դիտարկվել է նաև հենց այդ սցենարի վերաբերյալ ոչ պաշտոնական, անանուն տեղեկությունների համատեքստում, թեև եղել է նաև փաստացի իշխանափոխության տրամաբանություն պարունակող երկու հրապարակային հայտարարություն:

Դրանք հնչել են, իհարկե, ոչ նախկին նախագահների շուրթերից, սակայն նրանց ասոցացվող կամ մերձ ուժերի և գործիչների: Մեկը 14 կուսակցությունների հայտնի հայտարարությունը, որը նախորդել էր Արցախի նախկին նախագահների վարչապետի հետ հանդիպմանը, իսկ մյուսը՝ Վազգեն Մանուկյանի հայտնի կոչը կառավարության հրաժարականի և կառավարումը բանակին փոխանցելու, հետո պաշտպանական միասնական կոմիտե ստեղծելու մասին: Միով բանիվ, վարչապետի խոսնակի անդրադարձը, ըստ էության, հնչող հարցադրում է ինքնին՝ ինչո՞ւ չեն մեկնել Լևոն Տեր-Պետրոսյանն ու Ռոբերտ Քոչարյանը Մոսկվա: Եվ պատրաստվո՞ւմ են արդյոք մեկնել վարչապետ Փաշինյանի խոսնակի արձագանքից հետո, կամ պարզաբանել, թե ինչու չեն մեկնել:

Աղբյուրը՝ 1in.am