Ալիեւը հայտարարել է «առանց որեւէ պայմանի» Մոսկվայում Փաշինյանի հետ հանդիպելու պատրաստակամության մասին

Ադրբեջանի նախագահ Իլհամ Ալիեւը հայտարարել է «առանց որեւէ պայմանի» Մոսկվայում ՀՀ վարչապետ Նիկոլ Փաշինյանի հետ հանդիպելու պատրաստակամության մասին, սակայն կասկածում է, որ Երեւանն ունակ է ԼՂ հակամարտության կարգավորման հարցով կառուցողական աշխատանքի:

«Մոսկվայում բանակցությունների համար հրավեր չեմ ստացել: Բազմիցս մասնակցել եմ Ադրբեջանի, Հայաստանի եւ Ռուսաստանի նախագահների եռակողմ հանդիպումներին, սակայն այն բանից հետո, երբ Հայաստանում իշխանության եկավ Փաշինյանը, նման հանդիպումներ չեն եղել: Այդ հանդիպումները եղել են Հայաստանի նախկին նախագահների օրոք, եւ ես երբեք այդ հանդիպումներից չեմ հրաժարվել»,-ասել է Ալիեւը «Ինտերֆաքս»-ին տված հարցազրույցում:

Ալիեւը նշել է, որ այդ հանդիպումները դրական էր համարում, քանի որ Ռուսաստանը՝ որպես Մինսկի խմբի համանախագահ երկիր, հատուկ դեր ունի կարգավորման հարցում: «Ռուսաստանը մշտապես սերտ հարաբերություններ է ունեցել եւ՛ Հայաստանի, եւ՛ Ադրբեջանի հետ, եւ այսօր քաղաքական, տնտեսական ոլորտներում ակտիվ համագործակցում է Ադրբեջանի եւ Հայաստանի հետ: Այդ պատճառով ամենից շատ հանդիպումներ անցկացվել են Ռուսաստանում, սակայն Փաշինյանի օրոք նման հանդիպումներ չեն եղել: Չգիտեմ՝ որքանով արդյունավետ կլինեն դրանք հիմա…Սակայն եթե նման առաջարկ լինի, մենք դա կդիտարկենք եւ դրական կընդունենք»,-նշել է նա՝ հավելելով, որ պատրաստ է մեկնել Մոսկվա՝ հանդիպելու ՀՀ վարչապետի հետ,սակայն «առանց որեւէ պայմանի»: