Թրքամետ խմբավորման սիրիացի գրոհայինը սաուդական հեռուստատեսությամբ պատմել է, թե ինչպես են իրենց հավաքագրել Ղարաբաղ ուղարկելու համար

Թրքամետ «Սուլթան Մուրադ» խմբավորման կազմում ընդգրկված սիրիացի գրոհայինը Ամին Իմադ աս-Սաիդը սաուդական «Ալ-Հադաս» հեռուստաալիքի եթերում պատմել է, որ սիրիացի գրոհայիններն Ադրբեջանի կողմից կռվում են Լեռնային Ղարաբաղի հակամարտության գտում:

Ինչպես հաղորդում է EADaily-ն, սիրիացու խոսքով՝ գրոհայիններին հավաքագրում են տարբեր սիրիական խմբավորումներից: Նրանց հազարներով Թուրքիայով տեղափոխում են Ադրբեջան: «Հավաքագրողները հետևյալ պայմաններն են առաջարկում. «գործուղումը» տևում է 3 ամիս, պարգևատրումը կազմում է ամսական 2000 դոլար: Լիբիա պատերազմի մեկնողներին 1500 դոլար էր առաջարկվում, իսկ «ծառայության» ժամկետը վեց ամիս էր»»,- համեմատականներ է տարել աս-Սաիդը:

Նա պատմել է, որ վարձկանները մեծ կորուստներ են կրում Ղարաբաղում հայ զինվորների դեմ մարտերում:

Վերջինս հայտնել է, որ նախքան «Սուլթան Մուրադ» խմբավորման կազմում ընդգրվելը նախապատրաստում էր անցել սիրիական Աֆրինում՝ թուրք մասնագետների ղեկավարության ներքո: Այն ժամանակ նա ամսական 350 թուրքական լիրա (45 դոլար) աշխատավարձ է ստացել:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 26-ի դրությամբ Արցախի զինուժը խոցել է հակառակորդի՝ 16 ուղղաթիռ, 24 ինքնաթիռ, 220 անօդաչու թռչող սարք, 600 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 6 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6674 զոհ։ Հայկական կողմից, նախնական տվյալներով, կա 1009 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 40 քաղաքացիական անձ, վիրավորվել է 120 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։
Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։