Հունաստանի ԱԳՆ. Թուրքիայի համոզմունքը, թե ինքն է «լուծում» տարածաշրջանում խնդիրները, վիրավորական է

Եվրախորհրդի նիստից հետո Հունաստանի արտաքին գործերի նախարար Նիկոս Դենդիասի Հայաստան եւ Իրաք կատարած այցերից հետո Թուրքիայի խելահեղ արձագանքը միայն միջազգային մակարդակով ընդգծում է, թե ինչ փակուղում է գտնվում Թուրքիան` իր իսկ ընտրության պատճառով: Այս մասին հայտարարել է Հունաստանի ԱԳՆ ներկայացուցիչ Ալեքսանդրոս Յենիմատասը:

«Ինչ վերաբերում է վիրավորական հայտարարությանը, որ ինքը տարածաշրջանում բոլոր խնդիրների լուծման ընդհանուր հայտարարն է, Թուրքիան պետք է դա հաստատի տարածաշրջանի երկրների հետ, որոնք հավանաբար ավելի շուտ կարծում են, որ Թուրքիան իրենց խնդիրների ընդհանուր հայտարարն է»,- ասել է նա՝ մեկնաբանելով Թուրքիայի ԱԳՆ ներկայացուցիչ Համիդ Աքսոյի հայտարարությունը։

Վերջինս ասել էր, որ «մեր տարածաշրջանի բոլոր խնդիրների լուծման ընդհանուր հայտարարը Թուրքիան է, իսկ Հունաստանը խնդիրներ է առաջացնում կամ աջակցում է նրանց, ովքեր առաջացնում են»։