Բորիս Ջոնսոնը կոչ է արել պատրաստվել ԵՄ-ից դուրս գալուն առանց համաձայնագիր կնքելու

Մեծ Բրիտանիայի վարչապետ Բորիս Ջոնսոնը հայտարարել է, որ երկիրը Եվրամիության հետ որեւէ գործարք չի կնքելու, մինչեւ չտեսնի դաշինքի «մոտեցման մեջ հիմնարար փոփոխություն»,- հայտնում է The Guardian-ը։

Նա նշել է, որ երկիրը ստիպված կլինի պատրաստվել առանց գործարքի բրեքսիթի սցենարին։

Բրիտանացի վարչապետի մամուլի ծառայությունն ավելի ուշ այս հարցում հռետորաբանությունն է՛լ ավելի է կոշտացրել։

«Առեւտրային բանակցություններն ավարտվել են․ ԵՄ-ն դրանք արդյունավետորեն ավարտեց երեկ, երբ նրանք հայտարարեցին, որ չեն ցանկանում փոխել բանակցությունների վերաբերյալ իրենց դիրքորոշումը»,- հայտարարել է Մեծ Բրիտանիայի վարչապետի մամուլի քարտուղարը։

Սակայն Դաունինգ սթրիթի հոխորտանքը խափանել են Բրյուսելից, երբ գագաթնաժողովից հեռանալիս ԵՄ-ում հայտարարել են, որ պատճառներ չկան կարծելու, թե բանակցությունները չեն շարունակվելու։

«ԵՄ-ն շարունակելու է աշխատել գործարք կնքելու համար, բայց ոչ ամեն գնով։ Ինչպես եւ նախատեսվում էր, մեր բանակցողների խումբը հաջորդ շաբաթ կուղեւորվի Լոնդոն, որ այդ բանակցություններն ակտիվացնի»,- Twitter-ում նշել է Եվրահանձնաժողովի ղեկավար Ուրսուլա ֆոն դեր Լյայենը։

Այս ծրագրերին, սակայն, չի համաձայնել Մեծ Բրիտանիայի գլխավոր բանակցող լորդ Ֆրոսթը, որը ներքին առեւտրի հարցերով եվրահանձնակատար Միշել Բարնյեին ասել է, որ հաջորդ շաբաթ Լոնդոն գալու կարիք չկա։

Ֆրոսթը Բարնյեին ասել է, թե «երկուշաբթի Լոնդոնում բանակցությունների համար հիմքեր չկան», մինչեւ Բրյուսելը չներկայացնի նոր ծրագիր, հայտնել են Մեծ Բրիտանիայի կառավարության մամուլի ծառայությունից։

Այդուհանդերձ, Եվրահանձնաժողովի մամուլի ծառայությունից բանակցությունների վերաբերյալ տեղեկություն են տրամադրել։

«Ինչպես այս շաբաթ բանակցություններում համաձայնեցվել էր, Միշել Բարնյեն այսօր տեսակոնֆերանս է անցկացրել իր բրիտանացի գործընկեր Դեւիդ Ֆրոսթի հետ՝ քննարկելու բանակցությունների հարցը, որոնք կայանալու են հաջորդ շաբաթ։ Երկու բանակցողները պայմանավորվել են երկուշաբթի կրկին հանդիպել՝ քննարկելու համար այդ բանակցությունների կառուցվածքը»,- նշել են Եվրահանձնաժողովի մամուլի ծառայությունից։

Հաջորդ շաբաթ բանակցություններ անցկացնելու մասին տեղեկությունը հաստատել է նաեւ Գերմանիայի կանցլեր Անգելա Մերկելը։

Նիդեռլանդների վարչապետ Մարկ Ռյուտեն իր հերթին կարծում է, որ Ջոնսոնի կոչը ինտենսիվ բանակցություններ անցկացնելու եւ փոխզիջման գալու մասին ուղղակի բանակցությունները շարունակելու հրավեր էր, չնայած Մեծ Բրիտանիայի վարչապետի այն հայտարարությանը, որ այս գագաթնաժողովը գործարքի վերաբերյալ որոշում ընդունելու վերջին օրն էր։

Բորիս Ջոնսոնն իր հայտարարության մեջ նշել էր, որ մնացել է ընդամենը 10 շաբաթ մինչեւ բրեքսիթի անցումային շրջանի ավարտը, եւ ինքը պետք է հավանական արդյունքի վերաբերյալ որոշում ընդունի ու երկրին նախապատրաստի։

«Մեծ առաջընթաց է ձեռք բերվել այնպիսի հարցերի շուրջ, ինչպես սոցիալական անվտանգությունը եւ ավիացիան, միջուկային համագործակցությունը եւ այլն, բայց ինչ-ինչ պատճառներով ԵՄ գագաթնաժողովից պարզ է դառնում, որ Մեծ Բրիտանիայի անդամակցության 45 տարուց հետո նրանք չեն ցանկանում այս երկրին առաջարկել նույն պայմանները, ինչ Կանադային։ Ես հանգեցի այն եզրակացության, որ մենք պետք է պատրաստ լինենք համաձայնագրի ստորագրման, որն ավելի նման կլինի Ավստրալիայի հետ կնքածին․ գլոբալ ազատ առեւտրի պարզ սկզբունքների հիման վրա»,- լրագրողներին ասել էր Ջոնսոնը։