Փորձագետ. Եթե Ալիևը արդյունքի չհասնի ԼՂՀ-ում, նրան երկրում լուրջ խնդիրներ են սպասում

Եթե Ղարաբաղյան պատերազմի հետեւանքով Իլհամ Ալիեւին չհաջողվի լուրջ արդյունքների հասնել, երկրի ներսում նրան լուրջ խնդիրներ են սպասում: Այս մասին NEWS.am-ի թղթակցին տված հարցազրույցում ասաց ռուս լրագրող, ռազմական փորձագետ Պավել Ֆելգենհաուերը:

Նա նշեց, որ առայժմ ոչ մի կողմում խոշոր գործողություններ չկան, բայց հետագա սրման հավանականությունը շատ մեծ է:

«Իրավիճակը կարող է նույնիսկ հասնել նրան, որ սկսվեն «քաղաքների պատերազմներ», այսինքն փոխադարձ հրթիռային հարվածներ խոշոր քաղաքներին, ներառյալ՝ մայրաքաղաքներին: Իսկ կողմերը նման հնարավորություններ ունեն»,- ընդգծեց փորձագետը:

Նրա խոսքով՝ այժմ հարավային թեւում իսկական խառնաշփոթ է, պարզ չէ, թե ով եւ որտեղ է գտնվում, մանեւրային գործողություններ են ընթանում, չկա կանոնավոր առաջնագիծ, եւ նման պայմաններում պարզ չէ Մոսկվայում ստորագրված դեկլարատիվ համաձայնագրի էությունն ու իմաստը:

«Հրադադարի մասին համաձայնագիրը լուրջ ռազմատեխնիկական փաստաթուղթ է: Դրան պետք է կցվեն օպերատիվ քարտեզներ: Ամենակարեւորը՝ հանդիպմանը պետք է հրավիրվեին ռազմական պատվիրակություններ, ինչպես դա եղել է 90-ականներին՝ ղարաբաղյան առաջին պատերազմից հետո: Նման իրավիճակ էր 2016-ի ապրիլյան պատերազմից հետո, երբ Հայաստանի եւ Ադրբեջանի Գլխավոր շտաբերի պետերը հրավիրվեցին Մոսկվա: Բացի այդ, Մոսկվայում ստորագրված համաձայնագիրը պետք է ուժի մեջ մտներ 8 ժամից, սակայն համարյա անհնար է այդքան կարճ ժամանակահատվածում իրական հրադադար պատրաստել, նույնիսկ՝ տեխնիկական տեսանկյունից: Բայց կա նաեւ քաղաքական պահ՝ բոլորը համաձայն են հրադադարի հետ, բայց տարբեր պայմաններով: Ադրբեջանը ցանկանում է Ղարաբաղից հայկական զորքերի դուրսբերում եւ չի ցանկանում խոսել ԼՂՀ-ի հետ: Սակայն Հայաստանի համար նման պայմաններն անընդունելի են: Այսինքն, կողմերի դիրքորոշումները միանգամայն հակառակ են»,- հավելեց Ֆելգենհաուերը:

Անդրադառնալով արտաքին խաղացողների ազդեցությանը, փորձագետը նշեց, որ ԱՄՆ-ին այժմ չի հետաքրքրում ղարաբաղյան հակամարտությունը, եւ Թուրքիայի դեմ պատժամիջոցների կիրառումն էլ իրականում շատ քիչ հավանական է:

«Ռուսաստանը ձգտելու է հավասարակշռություն պահպանել Հայաստանի եւ Ադրբեջանի հարցում, բայց Թուրքիայի մուտքը տարածաշրջան Մոսկվային որեւէ կերպ չի կարող ձեռնտու լինել, քանի որ Կովկասում իր գերիշխող դերը վերականգնելու գաղափարը վտանգված է: Ինչ վերաբերում է Թուրքիային, ապա նա լուրջ խնդիրներ ունի՝ կապված ազգային արժույթի արժեզրկման հետ: Այս երկրում ֆինանսատնտեսական իրավիճակը շատ սարսափելի է, արտարժույթի պահուստները գրեթե զրոյական են: Եթե ամերիկացիները, ովքեր չեն վախենում սիրիական փախստականներից, ինչպես եվրոպացիները, միանային, նրանք կարող էին լրջորեն հարվածել Թուրքիային՝ անջատելով նրան, օրինակ, Swift-ից: Դա կհանգեցներ նրան, որ ֆինանսական համակարգը պարզապես կպայթեր: Արեւմուտքն ունի Թուրքիայի հարցերը լուծելու բոլոր գործիքները: Միայն թե ցանկություն լիներ»,- ընդգծեց փորձագետը:

Ֆելգենհաուերի հավաստիացմամբ՝ Էրդողանը այսպիսի պայմաններում հաջորդ ընտրություններում հաղթելու գրեթե ոչ մի շանս չունի, ուստի ստիպված է հույսը դնել ազգայնականների վրա եւ ազգայնական քաղաքականություն վարել: