Վերջին 14 օրերի ընթացքում Հայաստանում կորոնավիրուսով հիվանդացության 113 տոկոս աճ է գրանցվել

Վերջին 14 օրերի ընթացքում Հայաստանում կորոնավիրուսով հիվանդացության 113 տոկոս աճ է գրանցվել: Այս մասին լրագրողների հետ զրույցում տեղեկացրել է ՀՀ ԱՆ հիվանդությունների վերահսկման եւ կանխարգելման ազգային կենտրոնի ներհիվանդանոցային վարակների համաճարակաբանության բաժնի պետ Ռոմելլա Աբովյանը:

Մասնագետի խոսքով, հիվանդացության այս նկատելի աճի հիմնական պատճառը բնակչության կողմից հակահամաճարակային կանոնների չպահպանելն է. ռազմական դրության պայմաններում բոլորի ուշադրությունը ուղղված է դեպի արտաքին թշնամին, եւ շատերը մոռանում են կորոնավիրուսային վարակի մասին, որը, թուլացնելով թիկունքը, լուրջ վտանգ է ներկայացնում թե քաղաքացիական բնակչության, թե զինվորների համար:

«Հաշվի առնելով մեր ազգի հայրենասիրությունը, մեր ազգի հզորությունը, բոլորը ոտքի են կանգնել արտաքին թշնամու դեմ պայքարը մղելու համար: Տարբեր կամավորական ջոկատներ են ստեղծվում, հավաքագրվում են տարբեր օգնություններ: Սակայն այդ ընթացքում մարդկային կուտակումների արդյունքում, որեւէ մեկը անվտանգության կանոնները չի պահում, եւ սա կարող է բերել նրան, որ հիվանդությունը կարող է տարածվել եւ հասնել մեր զինվորին, ով սահմանին է կանգնած, եւ դրանով թուլացնել մեր զինվորի կամքը եւ առողջությունը: Սա զգոնության եւ սթափության կոչ է: Մենք հզոր ազգ ենք եւ կարող ենք միասնական պայքարել այս հիվանդության դեմ», - ասաց մասնագետը:

Կորոնավիրուսի տարածումը դանդաղեցնելու համար մասնագետրը հորդորում է հետեւել 3 պարզ կանոններին՝ կրել դիմակ, հաճախակի լվանալ ձեռքերը եւ պահպանել սոցիալական հեռավորություն: