Արման Սաղաթելյանը պատմում է, թե ինչպես է «ԱրմՆյուզի» նկարահանող խումբը Շուշիում հրթիռակոծությունից հետո փլատակների տակից դուրս բերել ռուս վիրավոր լրագրողին (տեսանյութ)
«Արմնյուզ» հեռուստաընկերության «Անվտանգության գործոն» հաղորդման հեղինակ Արման Սաղաթելյանը WarGonzo Telegram-ալիքին պատմել է Շուշիի հրթիռակոծման ժամանակ ռուս լրագրողների՝ Յուրի Կատյոնոկի և նրա ընկերոջ Լևոն Արզանովի վիրավորման մասին և թե ինչպես է «ԱրմՆյուզի» նկարահանող խումբը օգնել նրանց դուրս գալ փլատակներից:
«Երբ լուր ստացանք, որ Սուրբ Ղազանչեցոց եկեղեցու վրա հարված է եղել, մեր նկարահանող խումբը մեկնել է դեպքի վայր՝ տեղում նկարահանելու իրավիճակը: Ճանապարհին հայտնաբերել էինք «Սմերչ»-ի հետքեր տներից մեկի մոտ, այնուհետև անօդաչուների թռիչքներ էին տեղի ունենում մեր գլխավերևում, և մենք ուշացանք: Եվ երբ հասանք դեպքի վայր, ականատես եղանք, թե ինչպես է արկն ընկել եկեղեցու վրա: Վիրավորներից մեկին արդեն դուրս էին բերել, մեկը ոտքի վրա էր, սակայն ցնցման մեջ էր: Մեզ ասացին, որ ինչ-որ մեկը մնացել է ներսում: Ներս մտնելով՝ տեսանք կիսավեր տարածքը, որտեղ ամեն ինչ փոշով էր ծածկված և դժվար էր ինչ-որ բան տարբերակել: Այնտեղ գտանք երրորդ վիրավորին, արագ տեղավորեցինք մեքենայում և ուղարկեցինք հիվանդանոց: Բժիշկների խոսքով՝ նրանց վիճակը կայուն է, մեկի վիճակը ծանր է»,- ներկայացրել է Սաղաթելյանը:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 8-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 145 անօդաչու թռչող սարք, 496 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 4069 զոհ, ավելի քան 5270 վիրավոր։ Հայկական կողմից, նախնական տվյալներով, կա 361 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 20 քաղաքացիական անձ, Արցախում վիրավորվել է 93 քաղաքացիական անձ, զոհվել՝ 19 մարդ, վնասվել՝ մոտ 5800 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։