Արցախի զինված ուժերը համարժեք պատասխան են տալիս ադրբեջանական գործողություններին՝ թիրախավորելով զուտ ռազմական օբյեկտները. Արծրուն Հովհաննիսյան (տեսանյութ)
Ինչպես նշել ենք, այսօր առավոտյան ադրբեջանական զինված ուժերն սկսեցին մասսայական հրթիռակոծությունը Արցախի բնակավայրերի վրա, համապատասխան կադրերը ցուցադրել ենք, այնտեղ աշխատում են միջազգային ԶԼՄՆ-երը, որոնք թեև շատ հաճախ իրենց կյանքը ևս վտանգում են, բայց աշխարհին ներկայացնում են ողջ իրականությունը: Այս մասին հայկական միասնական տեղեկատվական հարթակում ասուլիսի ժամանակ ասաց ՊՆ ներկայացուցիչ Արծրուն Հովհաննիսյանը:
«Արցախի Պաշտպանության բանակի ուժերը համապատասխան պատասխան են տալիս ադրբեջանական նման գործողություններին, սակայն թիրախավորելով զուտ ռազմական օբյեկտները, զորքերը, զորախմբերը՝ բացառապես աշխատելով ռազմական թիրախների ուղղությամբ: Ադրբեջանի ռազմաքաղաքական ղեկավարության բոլոր այն մեղադրանքները, որոնք ուղղված են հայկական կողմին ապատեղեկատվություն են և ոչնչով հիմնավորված չեն: Այսօր առավոտյան հարավային ուղղությամբ հակառակորդը նորից ձեռնարկել էր լայնածավալ հարձակման փորձ՝ կիրառելով մեծաթիվ ուժեր, զրահատեխնիկա և այլն»,- ասաց նա:
Արծրուն Հովհաննիսյանն ընդգծեց՝ օրվա ընթացում նույնիսկ իրենց «հաջողությունը» փորձեցին «ամրագրել» հայկական ստորաբաժանումներում իրենց գտնվելու մասին տեսանյութերով և այլ «ապացույցների» միջոցով, բայց դա հերթական օրինակն էր, որ փոքրիկ, ժամանակավոր հաջողությունները փորձում են ներկայացնել որպես մեծ հաղթանակներ: «Մեր զորքերը, մեր զորքերի հրամանատարները մարտավարական հնարամիտ, գրագետ խուսանավումներով, հակառակորդին կարողացել են մեծ կորուստներ պատճառել և հետ շպրտվել, մոտավորապես 200 և ավելի զոհ են տվել միայն հարավային ուղղությամբ և միայն այսօրվա մարտերի ընթացքում»,- ասաց նա:
ՊՆ ներկայացուցիչը շեշտեց, որ մարտերը բավականին թեժ են եղել, բայց մեր կողմից կատարվել է գրագետ խուսանավում. «Հիմա թող նույն կերպ փորձեն ցույց տալ իրենց հաջողությունները, այսօրվա ընթացքում հետ են շպրտվել բավականին մեծ կորուստներով: Այս պահին, ցավոք, չեմ կարող ներկայացնել կոնկրետ թվական ամփոփումներ հակառակորդի զինուժի կորուստների մասին, որովհետև երկար ժամանակ մարտերն ընթանում էին, վաղվա ամփոփման ժամանակ ընդհանուր երկու օրվանը կներկայացնենք»,- եզրափակեց նա: