Աշխարհասփյուռ հայությունը աներեր կանգնած է իր զույգ պետությունների ու բանակի կողքին․ ՀՅԴ Բյուրոյի ներկայացուցիչ Հակոբ Տեր-Խաչատուրյանի ուղերձը

Սիրելի հայ ժողովուրդ․

Մեկ անգամ եւս Ադրբեջանը Թուրքիայի գործուն մասնակցությամբ գրոհեց մեր հայրենիքի վրա։ Արցախի սահմանի երկայնքով Ադրբեջանի հարձակումները ոչ միայն թիրախավորել են մեր բանակը, այլեւ սահմանային գոտու եւ նույնիակ Ստեփանակերտի եւ հարակից շրջանների անզեն քաղաքացիներին։ Ադրբեջանը հանդգնել է հարձակվել Հայաստանի բնակավայրերի վրա։

Թեեւ Հայոց բանակը տվել է անհրաժեշտ հակահարվածը եւ վճռել, որ անպայման հաղթելու ենք, մենք ունեցանք եւ տակավին կունենանք զեհեր, որոնց կորուստը կսգանք։ Նրանց հարազատներին ենք փոխանցում մեր խորին ցավակցությունները, հարգանքն ու երախտագիտությունը։

Մեզ համար գոտեպնդող է, որ ողջ հայությունը ի հայրենք եւ ի սփյուռս աշխարհի, բռնցքվեց որպես միասնական հարվածող ուժ՝ դիմակայելու համար հայրենիքին սպառնացող վտանգը։ Մենք աշխատելու ենք, որ ամեն գնով պահպանվի այդ միությունը եւ մեր թշնամիները տեսնեն, որ աշխարհասփյուռ հայությունը աներեր կանգնած է իր զույգ պետությունների ու բանակի կողքին։

Մենք այնպիսի պարտության պետք է մատնենք մեր թշնամիներին, որ Ադրբեջանն ու Թուրքիան այլեւս երբեք չհամարձակվեն պատերազմի միջոցով փորձենլ բռնազավթել Արցախը կամ հարձակվել Հայաստանի Հանրապետության վրա։

Սիրելի հայրենակիցներ

Այսօր թշնամին պատերազմ է սանձազերծել ողջ հայության դեմ։ Այսօր մեզնից յուրաքանչյուրը զինվորագրված է այս պատերազմին, որպեսզի իր կարողության սահմաններում սատարի մեր հաղթանակին։ Այսօր կյանքի-մահվան պայքար ենք մղում ոչ միայն Արցախի ճակատում։ Այնտեղ հայ զինվորը «Մահ կամ ազատություն» նշանաբանով մաքառում է թշնամու դեմ ու ոգին ի բուռ պաշտպանում է հայրենիքը, իսկ ողջ հայությունը շարունակում է աշխարհով մեկ պայքարել քաղաքական ու քարոզչական մարզադաշտերից ներս՝ զորաշարժի ենթարկելով համաշխարհային հանրությունը, որ նա դիրքորոշվի ի նպաստ Հայաստանի ու Արցախի։ Հայ Յեղափոխական Դաշնակցությունը այս հարձակման առաջին իսկ րոպեներից լարեց իր կազմակերպական մեքենան, կազմակերպեց ճակատ մեկնող կամավորական պահեստազոր, ծրագրեց Հայ դատի գրասենյակների եւ հանձնախմբերի ճանապարհով քարոզչական եւ լոբբինգի արշավ եւ իր համակիրների ցանցը մղեց լծվելու բազմաշերտ համաշխարհային պայքարի՝ ի սպաս մեր հայրենիքի։

Սեպտեմբերի 27-ի վաղ առավոտից չորս ուղղությամբ սկսեցինք մեր գործը։

Առաջին․ մարտական դաշտի վրա՝ Հայաստանում ու Արցախում զորաշարժի ենթարկեցինք մեր կամավոր պահեստազորը եւ որ մաս առ մաս մեկնեց եւ շարունակում է մեկնել Արցախ, պաշտպանության բանակի հրամանատարության նեքո իր մասնակցությունը բերելու այս գոյամարտին։ Խոր հարգանք իրենց ու բոլոր կամավորներին, որոնք ընդառաջեցին զորահավաքի կոչին ու այսօր մարտնչում են հայ զինվորի կողքին։

Երկրորդ․ միասնականության ստեղծման համար՝ մեծապես ողջունելի է այն համահայկական միասնականությունը, որը գրավականն է մեր հաջողության։ Ամեն գնով պետք է գուրգուրենք ու ամրապնդնենք այդ միասնականությունը մեր հայրենիքի ներսում եւ Սփյուռքում։ Սա լավագույն փաստն է, որ ճգնաժամի պահին, ամեն տարակարծություն մի կողմ դրած, մենք պարտավոր ենք բռնցքվելու եւ այդկերպ վարելու մեր հայրենիքի ու հայության սրբազան գործը։

Երրորդ․ համաշխարհային գրոհի կազմակերպությամբ՝ մեր պայքարը Արցախի սահմանագծի վրա չէ միայն։ Այսօր մենք պայքարում ենք աշխարհով մեկ քաղաքական ու քարոզչական մակարդակներով, որպեսզի քողազերծվեն թշնամիների իսկական նկրտումները, հարձակողապաշտ նկարագիրը եւ հայատյաց քաղաքականությունը։ Այսօր մեր դեմ մեծ պատերազմ են ծավալել Թուրքիան եւ Ադրբեջանը միջազգային ահաբեկչական վարձկանների ներգրավմամբ փորձում են շրջել պատերազմի ալիքը։ Ավելի քան երբեք անհրաժեշտ է հասցնել հատու հակահարված համահայկական բոլոր հնարավորություններով։ Արդեն սկսել ենք քաղել մեր մարմինների, Հայ դատի հանձնախմբերի եւ համակիրների կողմից տարվող քաղաքական ու քարոզչական գրոհի արդյունքները։ Պետություններ ենք շարժել միջազգայի կազմակերպությունների դեմ, միջազգային կազմակերպությունների ազդեցիկ դեմքեր անցել են գործի։ Արեւմտյան, արեւելյան, արաբական եւ նույնիսկ իսլամական աշխարհի մամլո գործակալությունները տարածում են մեր ներկայացուցիչների ելույթները տարածաշրջանային ուժերի եւ Մինսկի խմբի համանախագահող երկրներում, բազմապատկել ենք մեր երիտասարդների ցույցերն ու աշխատանքը ընկերային ցանցերի վրա։

Եւ չորրոդ․ մեր բանակի ու պետության նյութական կարիքների ապահովման համար՝ արդեն ձեռնարկել ենք համահայկական հանգանակություն, որպեսզի մենք էլ մեր բաժինը բերենք մեր բանակի ու հայրենիքի անմիջական կարիքներին, միաժամանակ աշխարհի տարբեր կողմերից՝ դեղորայք, սննդամթերք, հագուստեղեն եւ այլ անհրաժեշտ իրեր ու պարագաներ հասցնելու հայրենիք։

Սիրելի հոգեհարազատներ

Վտանգը տակավին առկա է, սակայն մեր վճռականությունն էլ անխախտ է։ Մեր հայրենանպաստ գործը պետք է շարունակենք վերանորոգ թափով, պետք է կռվենք աննկուն կամքով ու ողջ ուժով։ Անտարակույս հաղթելու ենք։

Կեցցե՛ մեր քաջարի բանակը,
Կեցցե՛ Արցախի Հանրապետությունը,
Կեցցե՛ Հայաստանի Հանրապետությունը,
Կեցցե՛ հայ ժողովուրդը։