ՄԱԿ գլխավոր քարտուղարը ապշեցնող է անվանել կորոնավիրուսի զոհերի թվի 1 միլիոն նիշը

ՄԱԿ գլխավոր քարտուղար Անտոնիո Գուտերեշը մարդկությանը կոչ է արել սովորել սեփական սխալների վրա այն բանից հետո, երբ կորոնավիրուսի համավարակի զոհերի թիվն անցել է 1 մլն նիշը, փոխանցում է ՏԱՍՍ-ը։

«Աշխարհը հասել է սարսափելի նիշի․ COVID-19 համավարակը խլել է միլիոն մարդու կյանք,- ասել է նա տեսաուղերձում։ - Սա ապշեցնող թիվ է։ Ընդ որում՝ չի կարելի մոռանալ, որ սա վերաբերում է յուրաքանչյուր առանձին մարդու կյանքի։ Նրանք որեւէ մեկի մայրերն են, հայրերը, եղբայրները, քույրերը, բարեկամները եւ գործընկերները»։

Գլխավոր քարտուղարը նշել է, որ համավարակի առանձնահատուկ դաժանությունը ընտանիքների համար մահացող ազգականի կողքին լինելու անհնարինությունն է։ «Ինչպե՞ս ասել «մնաս բարով»՝ մարդու ձեռքը չբռնելով, նրան չհամբուրելով, չգրկելով եւ չշշնջալով՝ «ես սիրում եմ քեզ»»։

«Մենք կարող ենք այս փորձությունը հաղթահարել,- հավելել է Գուտերեշը։ - Բայց մենք պետք է սովորենք սեփական սխալների վրա։ Կարեւոր է պատասխանատու առաջնորդությունը։ Կարեւոր է գիտությունը։ Կարեւոր է համագործակցությունը։ Իսկ ապատեղեկատվությունը սպանում է»։