Աճպարարություն կորոնավիրուսի թվերի հետ․ ինչո՞ւ է ուսուցիչների վարակվածության թիվը 10 անգամ փոքր վարակվածության ընդհանուր ցուցանիշից
Tert.am-ը գրում է.
«Կառավարությունը որոշեց դպրոցներում դասերը սկսել սեպտեմբների 15-ից, թե ինչու ոչ՝ 1-ից, այդպես էլ հոդաբաշխ բացատրություն չլսեցինք։ Բայց գոնե այդ օրերն արդյունավետ օգտագործեին ու բոլոր ուսուցիչների թեստավորման գործընթացը կյանքի կոչեին։ Մինչդեռ, երեկ հրավիրված մամուլի ասուլիսի ժամանակ ՀՀ ԱՆ Հիվանդությունների վերահսկման և կանխարգելման ազգային կենտրոնի համաճարակաբանության բաժնի պետ Լուսինե Պարոնյանը՝ անդրադառնալով ուսուցիչների թեստավորմանը, հայտնեց, որ սեպտեմբերի 7-ից թեստավորում է ակցկացվում ուսուցիչների և դպրոցական անձնակազմի շրջանում։ Նա նշեց նաև, որ նկատի ունենալով մեծ քանակը՝ հնարավոր չէր բոլորին միանգամից 2-3 օրվա ընթացքում թեստավորել, ուստի այն կավարտեն հոկտեմբերի առաջին 10-օրյակում։ Ոլորտի պատասխանատուի խոսքով՝ ուսուցիչների թեստավորման արդյունքում հայտնի է դարձել, որ ուսուցիչների շրջանում կորոնավիրուսով վարակվածությունը կազմում է 1-1.5 տոկոս։ Այս պահին 300-ից ավելի ուսուցչի կորոնավիրուսի թեստի պատասխանը դրական է եղել։
Փաստորեն դպրոցները բացվեցին, ով ում կարող էր, վարակեց, և միայն մեկ ամիս աշխատելուց հետո հայտնի կլինի, թե քանիսն են վարակված։ Հայտարարվում է, թե ուսուցիչների շրջանում կա ավելի քան 300 վարակված, պատկերացնո՞ւմ եք սրա բացասական հետևանքները։
Իսկ վարչապետը հայտարարում էր, թե պետք է այնպիսի նախապատրաստական ու կանխարգելիչ քայլեր անեն, որպեսզի դպրոցները բացելուց հետո ստիպված չլինեն նորից փակել։ Բայց աշնանային քաղաքական ակտիվության պարագայում կորոնավիրուսի վարակակիրների շատացումը կապում են դպրոցները բացելու հետ, ու ցանկացած պահի կարող են փակել, որպեսզի առիթ ունենան սահմանափակելու մարդկանց ազատ տեղաշարժն ու հանրահավաքային ակտիվությունը։
Բայց ի՞նչն է զավեշտը՝ ուսումնասիրությունից պարզ է դառնում, որ թեստավորված ուսուցիչների ընդամենը 1-1,5 տոկոսն է եղել վարակակիր։ Սա պետք է դառնա լայն քննարկման առարկա ու լուրջ ուսումնասիրության թեմա։ Փաստորեն Հայաստանում միջին վարակվածության ցուցանիշը թեստավորվածների համեմատ 10-15 տոկոսի շրջանում է, բայց ահա ուսուցիչների մոտ այդ ցուցանիշը 10 անգամ ցածր է։ Գուցե պետք է այս բացահայումը նաև հայտնել միջազգային մեր գործընկերներին, որ գիտենք այն մասնագիտությունը, որի պարագայում հիվանդացողները 10 անգամ պակաս են։
Իրականում մեր իշխանությունները պետք է ցույց տային, որ երկրում վարակվածների թվի աճ կա, որպեսզի ճնշեին ընդդիմությանը, իսկ դպրոցները բացելու համար հարկավոր էր ուսուցիչների վարակվածության թիվը նվազեցնել։ Ու հիմա ոչ մի կերպ չեն կարողանալու բացատրել, թե այդ ինչպես է, որ հանրության մեջ ապրելով, ունենալով սովորական շփումներ (այնպես չէ, որ ուսուցիչները բնակվում են դղյակներում ու ինքնամեկուսացված են օբյեկտիվորեն) նրանց շրջանում վարակվածության տարածման այսպիսի ցածր ցուցանիշ կա։
Աբրահամ Լիկնոլնը մի հրաշալի և ուսուցանող միտք ուներ․ «Ես բավարար հիշողություն չունեմ, որպեսզի սուտ խոսեմ»։ Իհարկե սուտդ պետք է լավ հիշես, որպեսզի չբռնվես։
Մեր պարագայում իշխանությունները պետք է հասկանան, որ պալատական փափուկ կյանքը կտրել է նրանց իրականությունից ու հիշողությունը կորցրել են, բայց դրա հետ մեկտեղ մեր ժողովուրդը լավ հիշողություն ունի, որպեսզի բռնացնի իշխանության ցանկացած սուտ»։