Զենքի իսրայելական արտադրողը 155 միլիոն դոլար է տրամադրել Ադրբեջանի իշխանությունների հետ կապված 2 ընկերությունների

Իսրայելի ավիատիեզերական եւ ավիացիոն տեխնիկա արտադրող ամենամեծ ընկերությունն առնվազն 155 միլիոն դոլար է փոխանցել երկու ընկերությունների, որոնք կապված են Ադրբեջանի կառավարության համար խոշոր չափի փողերի լվացման հետ: Israel Aerospace Industries պետական ընկերությանը, որը ավիացիոն եւ տիեզերական համակարգեր է արտադրում ինչպես ռազմական, այնպես էլ քաղաքացիական օգտագործման համար, այս վճարումների պատճառը մնում է անհասկանալի:

Այս մասին հայտնի է դարձել հազարավոր բանկային փաստաթղթերի վերաբերյալ արտահոսող տեղեկատվության արդյունքում, որոնք, ի վերջո, հայտնվել են Հետաքննող լրագրողների միջազգային կոնսորցիումի (ICIJ) ձեռքում:

Միջոցները փոխանցվել են անմիջապես այն բանից հետո, երբ IAI-ն Ադրբեջանի կառավարության հետ իր ամենամեծ գործարքներից մեկն է կնքել։ Սակայն գործարքի մանրամասներին ծանոթ աղբյուրը պնդում է, որ որեւէ միջնորդի վճարման մասին համաձայնություն չի եղել: IAI-ն որոշել է չցրել վճարումների բնույթի շուրջ մշուշը եւ զերծ մնալ փոխանցումների նախապատմության մասին հարցերին պատասխանելուց:

Վճարներն առկա են կասկածելի գործունեության մասին Deutsche Bank-ի պաշտոնատար անձանց կողմից ներկայացված մեկ տասնյակից ավելի հաշվետվություններում (SAR), որոնք ուղարկվել են Ֆինանսական հանցագործությունների կատարման ցանցին կամ FinCEN- ին՝ ԱՄՆ ֆինանսների նախարարության վարչությանը, որը պատասխանատու է անօրինական ֆինանսական գործողությունների, այդ թվում՝ փողերի լվացման եւ ահաբեկչության ֆինանսավորումների հայտնաբերման համար:

IAI-ի եւ Ադրբեջանի միջեւ գործարքը սկսվել է պայմանագրի հայտարարումից մոտ երկու տարի առաջ, եւ ընկերությունում քչերն են տեղյակ եղել դրանից: Ապրանքների առաջին խմբաքանակը առաքվել է գործարքի կնքումից մոտավորապես երկու տարի անց, իսկ առաքումները տեւել են առնվազն հինգ տարի: Ըստ իսրայելական եւ միջազգային լրատվամիջոցների հաղորդագրության, գործարքը ներառել է անօդաչու թռչող սարքերի եւ ՀՀՊ համակարգերի վաճառք: Ադրբեջանցիների համար սա արտասովոր չափերի բիզնես-գործարք է եղել, որը կազմել է երկրի պաշտպանության տարեկան 3,2 միլիարդ դոլար ընդհանուր բյուջեի ավելի քան կեսը:

IAI- ի համար գործարքը նույնպես գրեթե աննախադեպ է եղել: Աղբյուրներից մեկն այն անվանել է «մեղրամիս» Բաքվի հետ, որը սկսվել է մոտավորապես 2007-ին: