Ցանկացած քայլ պետք է լինի տրամաբանված, ժամանակին համարժեք․ այս պահին ՀՀ-ում արտակարգ դրությունից կարանտինի ռեժիմին անցնելը մեծ փոփոխություններ չի ենթադրում տնտեսությունում․ Թադևոս Ավետիսյան

ՀՅԴ Բյուրոյի տնտեսական հետազոտությունների գրասենյակի ծրագրերի համակարգող Թադևոս Ավետիսյանի խոսքով` նոր կորոնավիրուսի տարածման հետևանքով Հայաստանում արտակարգ դրությունից կարանտինի ռեժիմին անցնելը մեծ փոփոխություններ չի ենթադրում: Նա Tert.am-ի հետ զրույցում նկատեց, որ կարանտինի ռեժիմի ժամանակ կառավարությունը կարող է դնել սահմանափակումներ և կարգավորումներ, որոնք կային արտակարգ դրության ժամանակ:

«Օդային տարածքը բացելը գուցե նպաստի զբոսաշրջության ակտիվացմանը, որը կարող է ընդհանուր ակտիվություն բերել տնտեսության մեջ, բայց չմոռանանք, որ կարանտինի տնտեսական սահմանափակումների հիմնական պատճառը և հիմքը դեռ վերացված չէ, այսինքն, մենք հիմա ունենք շարունակվող համաճարակի հետևանքները և լայն իմաստով քանի դեռ հաղթահարված չէ համավարակը, և մենք չենք անցել բնականոն կյանքի, նշանակում է, որ նույն ռիսկերն ու սահմանափակումները պահպանվելու են»,- ասաց նա:

Թադևոս Ավետիսյանի խոսքով` մեր կողմից սահմանը բացելը չի նշանակում, որ ունենալու ենք զբոաշրջիկների մեծ հոսք մեր երկիր: «Իհարկե, օդային սահմանը բացելը մեկ դրական քայլ է, բայց դրա հետ մեկտեղ չպետք է մոռանանք, որ այն իր հետ բերում է նաև ռիսկեր` արդյոք կկարողանա՞նք սանիտարահիգիենիկ միջոցառումներ իրականացնել, որ նոր ալիք, նոր ներթափանցումներ չունենանք: Քանի դեռ համավարակը հաղթահարված չէ օդային, նույնիսկ հետագայոմ ցամաքային սահմանը բացելիս պետք է ուշադրության կենտրոնում պահենք համավարակի հսկայական հնարավոր նոր թափանցման կանխարգելումը»,- ասաց նա:

Կարանտինի ռեժիմում, տնտեսագետի կարծիքով, տնտեսական ակտիվության սպասել պետք չէ: Նա նշեց, որ տնտեսությունը դրական տեղաշարժ կարձանագրի, երբ համավարակը վերացված կլինի և տնտեսական սահմանափակումները հանված լինեն:

Դիտարկմանը, թե ինչ են ցույց տալիս միտումները` արդյոք ՀՀ-ը կկարողանա կանխարգելել համավարակի հետագա տարածումը, Թադևոս Ավետիսյանը պատասխանեց, որ ամեն ինչ կախված է նրանից, թե աշխարհում այն ինչ զարգացում կունենա:

«Անորոշությունները շատ են, և դրանք բխում են համավարակի տարածման ռիսկերից և պայմանավորված են առանձին տարածաշրջաններում կառավարման արդյունավետությունից: Առիթ ունեցել ենք նաև ասելու, որ համավարակի կանխարգելման և դրա դեմ պայքարի հակաճգնաժամային կառավարումը արդյունավետ չի եղել նաև մեր երկրում: Դա արձանագրվում է նաև ցուցանիշներով»,- ասաց նա:

Նա շատ կարևոր համարեց, որ կանխարգելիչ միջացառումները մեր երկրում լինեն ոչ թե ձևական, այլ նաև իրավիճակին համարժեք: «Պետք է ոչ խեղդել տնտեսությանը` անընդհատ սահմանափակումներ սահմանելով, ոչ էլ հանգիստ լինել: Ցանկացած սահմանափակում պետք է լինի տրամաբանված, ժամանակին համարժեք, և ամենակարևորը` դրանք կյանքի կոչելու հստակ մեխանիզմներ լինեն: Միայն սահմանափակումներ բերելով, պատժելով խնդիրը չի լուծվում, պետք է այնպես լինի, որ սահմանափակումներն ընկալելի լինեն և համարժեք իրավիճակին և մեկ հիմնական նպատակ ունենան, որ դա իրականում անհրաժեշտ է, պետք է պահպանվի: Մենք արդեն ունեցանք օրինակ մարտ-ապրիլ ամիսներին, երբ սահմանափակումները խիստ էին, բայց իրականում դրա կյանքի կոչելը չտեսանք, ինչի արդյունքում համավարակը տարածվեց ողջ երկրով մեկ»,- ասաց նա: