Greek City Times. Մտադի՞ր է արդյոք ԱՄՆ-ն 50 միջուկային ռումբ տեղափոխել Թուրքիայից Հունաստան
Գնալով ավելանում են ենթադրությունները, որ Միացյալ Նահանգները պատրաստվում են 50 միջուկային մարտագլխիկ տեղափոխել Հունաստան, որոնք պահվում են Թուրքիայի Ինջիրլիք բազայում, գրում է Greek City Times-ը:
Պարբերականը հիշեցնում է, որ Թուրքիայի նախագահ Ռեջեփ Թայիփ Էրդողանը սպառնացել է վտարել ամերիկացիներին ավիաբազայից, ինչպես նաեւ Վաշինգտոնի պաշտոնյաների` Ինջիրլիքը լքելու փորձերի մասին` Անկարայի գնալով «ահազանգող» արտաքին քաղաքականության պատճառով: Հարցեր են ծագում Ինջիրլիք բազայի ապագայի վերաբերյալ, որտեղ տեղակայված են ԱՄՆ միջուկային մարտագլխիկները, հատկապես` անցյալ տարի Վաշինգտոնի եւ Անկարայի միջեւ լարվածության կտրուկ սրումից հետո:
Էրդողանը դեկտեմբերին հայտարարել էր, որ Թուրքիան կարող է փակել բազան` ի պատասխան ԱՄՆ պատժամիջոցների սպառնալիքներին եւ Հայոց ցեղասպանությունը ճանաչող ԱՄՆ Սենատի բանաձեւին:
Էրդողանի վերջին արտաքին քաղաքականությունն ամերիկացի պաշտոնյաներին դրդել է արագացնել Ինջիրլիք ռազմաօդային կայանից դուրս բերման նախապատրաստական աշխատանքները, Washington Examiner-ին հայտնել է հանրապետական ավագ սենատոր Ռոն Զոնսոնը եւ ամերիկացի վերլուծաբանները:
«Մենք Հունաստանին արդեն որպես այլընտրանք ենք դիտարկում»,- ասել է Զոնսոնը: Զոնսոնի հայտարարությունները հնչեցվել են այն ժամանակ, երբ լարվածությունը սրվեց մի կողմից Անկարայի եւ Աթենքի եւ Նիկոսիայի միջեւ, իսկ մյուս կողմից` ածխաջրածնային պաշարների պատճառով Միջերկրական ծովի արեւելքում:
Մինչդեռ, ինչպես նշել է Զոնսոնը, ԱՄՆ-ն ընդլայնում եւ բարելավում է ռազմական համագործակցությունը Հունաստանի հետ:
Greek Times-ը գրում է, որ Էրդողանը գնալով մեկուսանում է այս սրման մեջ` նշելով, որ Թուրքիան չի ստացել որեւէ պետության աջակցությունը Հունաստանի եւ Կիպրոսի դեմ իր ագրեսիվ գործողությունների դեմ: