Կինը 100 տարի առաջ ուղարկված բացիկ է ստացել

Միչիգանում (ԱՄՆ) մի կին հաշիվների և փոստի հետ միասին ստացել է բացիկ, որն ուղարկվել էր գրեթե 100 տարի առաջ: Այս դեպքի մասին հայտնում է CNN- ը:

30-ամյա Բրիթանի Քիչն ասել է, որ զարմացել է՝ իր նամակագրության մեջ բացիկ գտնելով, քանի որ հիմա ոչ ոք դրանք չի ուղարկում: Այնուամենայնիվ, նա շատ չի կարևորել այս գտածոն: Միայն ավելի ուշ նա նկատել է փոստային նամականիշը, որը թվագրված է եղել 1920 թվականի հոկտեմբերի 29-ին:

Ֆլոսի Բերջես անունով ստորագրված բացիկն ուղարկվել է Բրետանիի հասցեին, բայց ոմն Ռոյ Մաքքուինը պետք է ստանար այն: «Հարգելի զարմիկներ, հուսով եմ, որ սա (բացիկը) ստանալիս բոլորդ առողջ կլինեք: Մենք մեզ շատ լավ ենք զգում, բայց մայրիկի ծնկները ահավոր ցավում են: Այստեղ ահավոր ցուրտ է: Ես նոր եմ ավարտել իմ պատմության դասը և գնում եմ քնելու: Հայրս սափրվում է, իսկ մայրս ինձ թելադրում է ձեր հասցեն: Ես ստիպված կլինեմ ընդմիջել գիշերը: Հուսով եմ, տատիկն ու պապիկը լավ են: Մի մոռացեք գրել մեզ», – գրված է բացիկի վրա: Բացիկի նկարազարդումները վերաբերում են Հելոուինին՝ սև կատու՝ ցախավելով, չղջիկ, սագ, բու և ձեռնափայտով կին:

Փոստային ծառայության ներկայացուցիչը հեռուստաալիքին բացատրել է, որ նման դեպքերը միշտ չէ, որ կապված են փոստի աշխատանքի սխալների հետ: Պատահում է, որ հնաոճ իրերի խանութներում, շուկաներում կամ համացանցում գնված հին նամակներն ու բացիկները կրկին մուտքագրվում են փոստային ծառայության տվյալների բազա: