Ֆրանսիայում ցանկանում են արագացնել կորոնավիրուսի դեմ պայքարին մասնակցած արտասահմանցիների քաղաքացիություն ստանալը
Աղբ հավաքողները, մթերային խանութների գանձապահները, արտասահմանցի բուժքույրերը եւ բժիշկները, ովքեր աշխատել են երկրի համար ճգնաժամային պայմաններում, կարող են ավելի արագ դառնալ Ֆրանսիայի քաղաքացիներ, քան մյուս դիմողները, ասել է քաղաքացիության հարցերով նախարար Մարլեն Շյապան:
Նախարարը Le Parisien թերթին տված հարցազրույցում ասել է, որ ցանկանում է «արագացնել քաղաքացիություն ստանալու ընթացակարգը այն արտասահմանցիների համար, ովքեր կարանտինի ընթացքում առաջնագծում էին»:
Ընդ որում Մարլեն Շյապան պարզաբանել է, որ խոսքը նրանց մասին է, ովքեր արդեն դիմել են Ֆրանսիայում քաղաքացիություն ստանալու համար: Այս մտադրություններն իրականացնելու համար նախարարը պատրաստվում է հատուկ հանձնարարական-շրջաբերական ուղարկել պրեֆեկտուրաներին, հայտնում է RFI-ն:
Բացի այդ, Ֆրանսիայի ներքին գործերի նախարար Ժերալդ Դարմանենի հետ միասին, նա հաստատում է, որ այսուհետ ֆրանսիական քաղաքացիություն ստանալը պետք է դառնա ավելի քիչ ֆորմալ, բայց ավելի հանդիսավոր:
Նրանց թվում, ովքեր աշխատել են այն ժամանակ, երբ ամբողջ երկիրը տանը նստած էր, նախարարը առաջին հերթին անվանել է աղբ հավաքողներին, մթերային խանութների գանձապահներին, բուժքույրերին եւ բժիշկներին: