ԳԴՀ-ի իշխանություններին զայրացրել են հակակորոնավիրուսային ակցիայի մասնակիցների կայզերական Գերմանիայի դրոշները
Դաշնային կառավարությունը զայրացած է հանգամանքով, որ COVID-սահմանափակումների դեմ ցույցերի մասնակիցներն օգտագործել են կայզերական Գերմանիայի սեւ-սպիտակ-կարմիր դրոշները Բեռլինում Ռեյխսթագի շենքի հարեւանությամբ։ Այդ մասին հայտարարել է ԳԴՀ-ի ՆԳ նախարար Հորսթ Զեհոֆերը։ Զրույցից մեջբերումներ է ներկայացնում Bild am Sonntag գերմանական պարբերականը։
Զեհոֆերի խոսքով՝ շենքը, որտեղ անցկացվում են խորհրդարանական լսումները, ըստ էության՝ «մեր ազատ ժողովրդավարության խորհրդանշական կենտրոնն է»։
Այն, որ «արմատականներն ու ծայրահեղականներն» օգտագործել են դա իրենց նպատակներով՝ անտանելի է, համարում է ՆԳ նախարարը, հաղորդում է DW-ը։
Գերմանիայի նախագահ Ֆրանկ Վալտեր Շթայնմայերն իր հերթին անվանել է տեղի ունեցածը «անհանդուրժելի հարձակում մեր դեմոկրատիայի հենց սրտին», իսկ ԱԳ նախարար Հայկո Մասը բնութագրել է թվիթերում այդ երեւույթը որպես «խայտառակություն»։
Շաբաթ երեկոյան՝ օգոստոսի 29-ին, Գերմանիայի կառավարության՝ կորոնավիրուսի դեմ պայքարի քաղաքականության դեմ պայքարող ցուցարարները հավաքվել են Ռեյսթագի մոտ եւ տապալել արգելապատնեշը։ Ցուցարարները նետել են իրավապահների ուղղությամբ քարեր եւ շշեր։
Բախումներ են տեղի ունեցել նաեւ Բեռլինում ՌԴ դեսպանատան մերձակայքում։ Այդտեղ հավաքվել էին աջակողմյա արմատականները եւ ՌԴ նախագահ Վլադիմիր Պուտինի գերմանացի կողմնակիցները, որոնք, իրենց հերթին, կազմակերպել էին չարտոնագրված ակցիա։ Նրանք նույնպես շշեր եւ քարեր էին նետել ոստիկանների ուղղությամբ, իսկ վերջիններս կիրառել էին արցունքաբեր գազ։ Դիվանագիտական առաքելության շենքի մոտ ոստիկանությունը բերման էր ենթարկել շուրջ եւկու հարյուր մարդու։