Բագրատաշենում 28 օր գտնվող ռուսաստանաբնակ հայերը վաղը կմեկնեն Ռուսաստան

Բագրատաշենի անցակետում գտնվող ռուսաստանաբնակ մեր հայրենակիցների ջանքերն ապարդյուն չանցան։ Հուլիսի 30-ից՝ առանց տանիքի, կենցաղային անհրաժեշտ պայմանների բացակայությամբ անցակետում ապրող մեր հայրենակիցները վաղը՝ օգոստոսի 27-ին, կմեկնեն Ռուսաստան։ NEWS.am-ի հետ զրույցում նրանցից Գեղամ Բաղդասարյանն ասաց, որ ուրախալի այս լուրը օրեր առաջ են ստացել ՀՀ-ում ՌԴ դեսպանատնից։

«Վաղն առավոտյան՝ 8-ին պետք է ճանապարհ ընկնենք»,- նշեց նա։

Մեկնողների ընդհանուր թիվը 67 է, նրանցից 19-ը ՀՀ քաղաքացիներ են, որոնք երեկ կորոնավիրուսի թեստ են հանձնել, բոլորի պատասխանը բացասական է եղել, իսկ ՌԴ քաղաքացիները Հայաստանում թեստեր չեն հանձնել։

Նկատենք, երբ մեր հայրենակիցները Բագրատաշենի անցակետ էին տեղափոխվել՝ նրանց թիվը 81-ն էր, այս օրերի ընթացքում մի մասին հաջողվել է ինքնաթիռով մեկնել։

Այն քաղաքացիները, որոնք սեփական մեքենաներով էին տեղափոխվել Բագրատաշեն, այս ընթացքում մեքենաները հատուկ փոխադրամիջոցներով տեղափոխել են Ռուսաստան։

«Ներկա պահին 3 մեքենա կա, թղթաբանությամբ են զբաղվում, կարծում եմ՝ երեկոյան դրանք էլ կուղարկենք»,- նշեց Գեղամը։

Հիշեցնենք, որ համավարակով պայմանավորված սահմանափակումների պատճառով՝ նրանք չէին կարողանում հատել սահմանը։ ՌԴ դեսպանատան դիմաց ակցիաներ անելուց և անարձագանք մնալուց հետո ստիպված ծայրահեղ քայլի դիմեցին և հուլիսի 30-ին մեկնեցին Բագրատաշեն, որպեսզի իրենց խնդրին ուշադրություն դարձնեն և հնարավոր լինի տեղափոխվել Ռուսաստան։