Եթե Կառավարությունը մտածում է, որ թույլ են տալու «Լիդիան»-ը գործունեություն իրականացնի, և ներքին պայմանավորվածություն ունեն, ապա դա մեր երկրի համար հղի է լուրջ հետևանքներով. Նազենի Վարդանյան
«Լիդիան»-ի պահնորդական ծառայությունը նպատակաուղղված ծրագիր է մշակել և ամեն ինչ անում է, որ ջերմուկցիների համբերության բաժակը լցվի, բայց, փառք Աստծո, ջերմուկցիները այդ սադրանքներին չեն ենթարկվում, սակայն դա լուրջ վտանգներ է իր մեջ պարունակում. Tert.am–ի հետ զրույցում նշեց իրավաբան- բնապահպան Նազենի Վարդանյանը՝ անդրադառնալով վերջին շրջանում Ամուլսարի շուրջ ընթացող զարգացումներին:
«Ջերմուկցիներն երեք-չորս օր Ամուլսարի ճանապարհն էին փակել, կոնֆլիկտային իրավիճակ էր, երեկ Կառավարության շենքի մոտ էին, սակայն Կառավարությունը ձայն չի հանում, այս լռությունը լավ հետևանքներ չի ունենալու: Եթե իրենք մտածում են, որ այս լռությամբ, թույլ են տալու, որ այդտեղ գործունեություն իրականացնեն, և ներքին պայմանավորվածություն ունեն «Լիդիան»-ի հետ, դա մեր երկրի համար հղի է լուրջ հետևանքներով»,- ասաց նա:
Բնապահպանը նշում է, որ «Լիդիան» ընկերությունը հայտարարում է, որ ներդրումներ է արել, սակայն դա իրականությանը չի համապատասխանում, և եթե Ամուլսարի պահապանները թույլ տան, որ «Լիդիան Արմենիա» ընկերությունը հանքում աշխատանքներ իրականացնի, ապա «Լիդիան»-ը դա բերելու է իրավական դաշտ և պետությանը պահանջներ է ներկայացնելու՝ ասելով, որ պետությունը մեր գործունեությունը չի խոչընդոտել, ինչը չպետք է թույլատրել:
Անդրադառնալով «Լիդիան»-ի հայտարարությանը, որ իրենց գործունեությունը օրինական է, Վարդանյանը նշեց, որ ի սկզբանե նրանց գործողությունները անօրիանական են, քանի որ «Լիդիան»-ը Ջերմուկում լսումներ չի կազմակերպել և եթե համայնքը թույլ չի տալիս այդ տարածքում գործողություն իրականացնել, ապա իրենք պետական մարմիններից թույլտվություն չեն կարող ունենալ:
Նազենի Վարդանյանին անհանգստացնում է նաև այն հանգամանքը, որ Կառավարությունը խնդրի լուծման վերաբերյալ երկու տարվա ընթացքում կոնկրետ քայլեր չի ձեռնարկել.
««էլարդ»-ին 450 հազար դոլար գումար փոխանցեցին, և ոչ մի գնահատական չտրվեց և իրավական հետևանքներ չունեցավ: Տեսչական մարմինը գնացել ստուգել էր, ապօրինի հանքարդյունահանություն էր հայտնաբերել, գործունեությունը արգելել էր, հետևողական չեղան, գործը գնաց դատարան, տեսչական մարմնի նոր տնօրենը տեր չկանգնեց և այդ որոշումը չեղյալ համարվեց:
Երկու քրեական գործ կա, որը երկու տարի է՝ քննում են, բոլոր դատավարական ժամկետները բաց են թողվել, դրա մասին ոչ մեկ չի խոսում և պատասխանատվություն չի կրում: Մենք մատնանշել ենք, թե ժամանակին ինչ կոռուպցիոն ռիսկեր են պարունակել: Կամ ինչո՞ւ որևէ մեկը չհարցրեց, թե Ջերմուկի քաղաքապետը ի՞նչ իրավունքով է այդ ճանապարհային, բուֆերային պաշտպանական գոտին վարձակալության տվել, և ի՞նչի հիմքով, ինչո՞ւ հետևողական չէր լինում, որ այդ խախտումները վերանար, հատկապես որ Գնդևազի գյուղապետի նկատմամբ քրեական գործ է հարուցվել ու պարզ է դարձել, թե ի սկզբանե ինչ խախտումներով են օտարվել և վարձակալության տվել: Նոր Կառավարությունը հետևողական պետք է լիներ»:
Բնապահպանի խոսքով՝ «Լիդիան»-ին գործողություններ իրականացնելու թույլտվությամբ խախտվել է մի շարք բնապահպանական կոնվենցիաներ և օրենքներ, որը Հայաստանը բնապահպանության ոլորտում վավերացրել է.
«Մենք չէինք դիմում կոնվենցիաների, մտածում էինք, որ հեղափոխություն է եղել, ժամանակ տանք մտածելու, հիմա դիմել ենք բոլոր կոնվենցիաներին և վարույթ են ընդունել ու եթե սանկցիաներ կիրառեցին և մեզ որևէ կոնվեցիայի անդամությունից հեռացնեն, դա միջազգային վարկանիշի կորուստ է լինելու, իսկ արդեն կոնվենցիաներից մեկը երրորդ նախազգուշացումն է տվել, որ մեզ անդամակցութունից կհեռացնի:
Բեռնի կոնվենցիան նոր է վարույթ վերցրել, նշել է, որ նախարարությունը իրավունք չունի պաշտպանությունից հանելու այդ տարածքները, այն պետք է պաշտպանվի»,-նշեց նա:
Նազենի Վարդանյանը համոզված է, որ Կառավարության կողմից հիմա վերջնական լուծում կայացնելու համար հարմար ժամանակ է, քանի որ «Լիդիան» ընկերությանը Մայր կազմակերպությունը սնանկացման գործընթացում է, քանի որ նրանց բոլոր ակտիվները և բաժնետոմսերը անցել են բանկերին:
Նա ընդգծում է, եթե Կառավարությունը խնդրին լուծում չտա, այն լուրջ հետևանքներ է ունենալու և ամբողջ պատասխանատվությունը ընկնելու է Կառավարության վրա.«Պետք է այս հարցը լուծվի, որ հետո չասեն, ո՞նց եղավ, որ մենք կորուստներ ունեցանք: Մարդիկ երկուսուկես տարի ընտանիքներից կտրված, իրենց հողն ու ջուրն են պաշտպանում և ինչ-որ պահնորդական կազմակերպություն կարող է մարդկանց իրավունքները խախտի՞ և բռնի ուժով վագոն –տնակները հանի՞»: