Մարդուն բանտել են ու ոչինչ չեն անում. Սեդրակ Առուստամյանի կալանքի ժամկետը եւս 2 ամսով երկարացվեց
«Մուլտի գրուպ կոնցեռն» ՍՊԸ-ի տնօրեն Սեդրակ Առուստամյանի կալանքի ժամկետը եւս 2 ամսով երկարացվեց։ Այս մասին NEWS.am-ի հետ զրույցում ասել է Առուստամյանի փաստաբան Հովիկ Սուքիասյանը։
«Հանցագործության դեպքի բացակայության պայմաններում մարդուն 4 ամիս է՝ կալանքի տակ են պահում եւ շարունակելու են եւս 2 ամիս կալանքի տակ պահել։ Այստեղ իրավաբանություն գոյություն չունի»,- ասաց Սուքիասյանը։
Փաստաբանը նշեց, որ Առուստամյանին կալանավորելուց հետո որեւէ քննչական գործողություն չի իրականացվել.
«Կալանավորել են ու բացարձակ որեւէ քննչական գործողություն չեն իրականացնում։ Այս մարդուն բանտել են այնտեղ ու ոչինչ չեն անում իր հետ»։
Սուքիասյանն ասաց, որ պատրաստվում են առաջին ատյանի դատարանի որոշման դեմ վերաքննիչ բողոք ներկայացնել։
Առուստամյանին մեղադրանք է առաջադրվել՝ ՔՕ 312-րդ հոդվածի 3-րդ մասով (առանձնապես խոշոր չափի կաշառք տալը) եւ 38-190-րդ հոդվածով (փողերի լվացման օժանդակությունը):
Նշենք, որ ըստ Դատախազության հաղորդագրության՝ Առուստամյանը 22.401.000 ԱՄՆ դոլարի կաշառք է տվել 2008-2014 թթ ՊԵԿ նախագահի, ապա՝ Ֆինանսների նախարարի պաշտոնը զբաղեցրած անձին՝ ընդհանուր հովանավորչության, վերջինիս ղեկավարման ներքո գտնվող հարկային եւ մաքսային մարմինների կողմից իր ներկայացրած առեւտրային կազմակերպությունների գործունեության համար խոչընդոտներ չստեղծելու եւ այլ նպատակներով, իսկ այդ գումարների հանցավոր ծագումը թաքցնելու համար դրանք փոխանցվել են Գագիկ Խաչատրյանի որդիների մատնանշած եւ նրանց հետ փոխկապակցված օտարերկրյա, ոչ ռեզիդենտ կազմակերպությունների հաշվեհամարներին։ Ինչպես նաեւ, նշված գործարքի հանցավոր բնույթը թաքցնելու եւ քողարկելու համար վերջիններիս եւ Ս․Ա-ի միջեւ կնքվել են փոխառության պայմանագրեր՝ համապատասխանաբար 7.000.000 եւ 13.400.000 ԱՄՆ դոլարի։